Skip to Main Contents

ᓄᓇᙳᐊᑦ | ᐃᓕᑕᕆᔭᐅᓂᕐᑖᑐᑦ | ᖃᐅᔨᒋᐊᕐᕕᒋᑎᒍᑦ | Français | English

Portrait of Beatrice Deer smiling, with a painting of flowers in the background.

ᓇᓗᓀᕐᑕᐅᔪᑦ

ᐱᑦᕆᔅ ᑎᐊ

ᑕᑯᒥᓇᕐᑐᑦ, ᑭᓇᐅᓂᖅ ᐃᓅᓯᕐᓗ • ᐱᑦᕆᔅ ᑎᐊ

Two women standing face to face, throat singing.

ᐱᑦᕆᔅ ᑎᐊ, ᐸᐅᔪᖏᑦ ᓄᑕᕌᓗᒃ

ᐲᑐᕆᔅ ᑎᐊ ᓂᑦᔭᓗᑦᑖᑎᐅᕗᖅ, ᓂᑦᔭᓗᑦᑖᕈᓯᓕᐅᕐᑎᐅᓱᓂᓗ ᐱᒐᓱᐊᒻᒪᕆᑦᑎᐅᓱᓂᓗ ᖁᐊᕐᑕᒥᐅᔭᐅᑦᓱᓂ. ᐃᓚᖃᕐᑎᓗᒋᑦ ᓂᑦᔭᓗᑦᑖᐸᓐᓂᖏᓐᓂᒃ ᓇᓪᓕᐅᓂᕐᓯᐅᑐᖃᓕᕐᒪᑦ ᐃᓄᑐᐃᓐᓀᓗ ᐃᓗᕐᖁᓯᖏᓐᓂᒃ ᖃᓄᐃᓘᕈᑎᖃᕐᑐᖃᓕᕐᒪ, ᑕᒐᑕᒐ ᐱᓇᓱᒐᖃᕐᐳᖅ ᓄᓇᕕᒻᒥᐅᑦ ᓴᓇᖕᖑᐊᑏᓪᓗ ᖃᓄᑐᐃᓐᓇᓗ ᓱᒐᓱᐊᕈᑎᖃᕈᓐᓇᑐᑦ ᐸᐸᑕᐅᕕᖓᓂ ᐊᕙᑕᖅ ᐱᐅᓯᑐᖃᓕᕆᕕᒻᒥ ᒪᓐᑐᔨᐊᒦᑦᑐᒥ.

« ᑕᑯᒥᓇᕐᑐᓕᐅᕐᓂᖅ ᐃᓅᓯᕐᒪᑦ ᑐᖕᖓᕕᒋᕙᐅᒃ. ᐃᓕᒃᑯᓕ ᑕᑯᒥᓇᕐᑐᓴᔭᑎᒍᑦ ᓄᐃᑦᓯᓂᖅ ᐱᒻᒪᕆᐅᑎᑉᐸᕋ. ᑕᑯᒥᓇᕐᑐᓕᐅᕐᑎᐅᓱᓂ ᓴᕐᕿᑎᑦᓯᓂᕐᒥᒃ ᐱᐅᓯᑐᐃᓐᓇᖃᕐᓇᒪᑦ. ᑐᑭᓯᒪᕙᒃᑲ ᑕᑯᒥᓇᕐᑐᓕᐅᕐᑏᑦ ᑌᒫᒃ ᐃᑉᐱᓂᐊᕐᓂᖃᓱᖑᓂᖏᑦ. ᑌᒣᒻᒪᒃ ᐃᑲᔪᕐᐸᐳᖓ ᑕᑯᒥᓇᕐᑐᓕᐅᕐᑎᓂᒃ ᐱᓇᓱᕝᕕᒐᓂ ᑮᓇᐅᔭᕐᓯᐅᕈᑦᔨᕙᑦᓱᒋᑦ ᐱᓇᓱᒐᑦᓴᑖᕐᐸᓱᖏᓪᓗ ᕿᓂᖃᑎᒋᕙᑦᓱᒋᓪᓗ ᐱᓇᓱᕝᕕᒋᒐᔭᕐᑕᖏᓐᓂᒃ: ᓴᓇᖕᖑᐊᓂᕐᒥᒃ, ᒥᖑᐊᕐᓯᒪᔪᓕᐅᕐᓂᒥᒃ, ᐊᑐᐊᒐᑦᓴᔭᓗᐅᕐᓂᒥᒃ, ᑕᕐᕋᓕᔮᒐᓕᐅᕐᓂᒥᒃ, ᑐᓴᕐᓂᔮᕈᑎᓕᐅᕐᓂᒥᒃ, ᐊᒥᓱᐃᓂᓪᓗ ᐊᓯᖏᓐᓂᒃ… ᐊᓯᓕᒫᖏᓐᓂᓗ.

ᖃᓄᑐᐃᓐᓇᖅ ᑕᑯᒥᓇᕐᑐᓕᐅᕐᓂᓂᓪᓗ ᐊᓯᖏᓐᓂᓗ ᐱᒐᓱᑦᑕᐅᒍᓐᓇᑐᓂᒃ ᐱᓂᐊᕐᓂᖃᓲᖑᑦᓱᓂ ᓇᒻᒥᓂᖅ ᐃᑉᐱᓂᐊᕈᑎᒋᔭᓂᒃ ᓄᐃᑦᓯᒍᓐᓇᓂᖃᑦᓯᐊᓇᖕᖏᑐᖅ… ᐅᕙᒃᑯᓕ, ᐅᖃᕐᖃᔦᑐᐊᕋᒪ ᐃᑉᐱᓂᐊᕈᑎᒃᑲᓂᒃ, ᓂᑦᔭᓗᑦᑖᕈᓯᑎᒍᑦ ᐊᓂᑦᓯᕙᑉᐳᖓ. ᑕᒃᒐᓂᓕ ᑕᒃᒐ ᐅᕙᖓᓪᓚᕆᒃ ᑐᓴᕐᓴᕉᑎᕙᑉᐳᖅ.

ᐱᒻᒪᕆᐅᒻᒪᑦ ᐱᑐᑦᓯᒪᓂᖃᕐᓂᖅ ᑭᖑᓂᑦᑎᓃᑦᑐᓄᓪᓗ ᐱᐅᓯᑐᖃᑦᑎᓄᓪᓗ. ᑭᓇᐅᓂᕐᓂᒃ ᓱᕐᖁᐃᓯᒪᑦᓯᐊᓂᓕᒫᕐᓂ ᐃᒻᒥᓂᒃ ᑐᑭᓯᒪᑦᓯᐊᓂᕐᓴᐅᓇᕐᒪᑦ. ᐃᓱᕐᕆᒋᔭᖃᕐᓂᓴᐅᒍᕕᓪᓗ ᑭᓇᐅᓂᕐᓂᒃ, ᐃᓄᓰᑦ ᐃᓱᐊᕐᓂᓴᐅᓂᐊᕐᓱᓂ, ᑕᒪᒃᑯᐊ ᐃᓘᓐᓇᑎᒃ ᑭᓇᐅᓂᕐᒨᓕᖓᔪᑦ. ᖃᓄᑐᐃᓐᓇᖅ ᐱᓂᐊᕐᓂᑎᒍᑦ, ᐊᓐᓄᕌᕐᓯᒪᒍᓯᑦᑎᒍᑦ, ᐅᖄᓂᑦᑎᒍᑦ, ᐃᓘᓐᓈᒍᑦ.

ᑭᓇᐅᒋᒐᓱᓐᓃᑦ ᖃᐅᔨᒪᖕᖏᑐᐊᕈᕕᐅᒃ, ᐅᓚᐱᕐᓴᐅᑎᖃᖕᖏᓚᖅ, ᑐᕌᒐᖃᕐᓇᓂᓗ, ᐊᒫᖃᕋᓂᒃ, ᑐᖕᖓᕕᖃᕋᓂ, ᓱᓇᖃᖕᖏᑐᖅ. ᐃᕐᐸᖓᔪᖅ ᓲᕐᓗ ᐃᓄᓰᑦ. ᑌᒣᒻᒪᑦ ᐊᒥᓱᐊᓗᓐᓂᒃ ᐊᑦᔨᒌᑦᑎᖏᑦᑐᓂᒃ ᐅᑦᑐᕋᕐᐸᑐᒍᑦ, ᕿᓂᕐᓱᑕ. ᑌᒣᒻᒪᓗ ᖃᐅᔨᒪᓂᕐᓴᐅᑐᐊᕈᑦᑕ ᓇᑭᕐᖓᓂᑕᐅᒻᒪᖔᑦᑕ ᐱᔪᕆᒪᓂᖃᕐᓂᓴᐅᓂᐊᕐᑐᒍᑦ, ᓲᖑᓂᖃᕐᓂᓴᐅᓗᑕᓗ ᓄᓪᓚᖓᓂᕐᓴᐅᓗᑕᓗ.

ᐊᕐᕌᒍᓂ ᑕᓪᓕᒪᓂ ᐊᒥᓱᓂᒃ ᐊᓯᑦᔨᓂᕐᓂᒃ ᐊᑑᑎᖃᑦᑕᓯᒪᓕᕐᐳᖓ, ᐊᒥᕐᖄᖃᑎᖃᕈᒪᕗᖓ ᐃᓄᑐᐃᓐᓇᓂᒃ ᑭᓯᐊᓂ ᐊᒥᕐᖃᖃᑎᑐᐊᖃᕈᓐᓀᓗᖓ ᐃᓄᓕᒫᓂᓪᓕ, ᐃᓅᓯᖅ ᐅᖁᒣᓕᕙᒻᒪᑦ, ᑭᓯᐊᓂ ᐱᐅᓯᒋᐊᕈᓐᓇᑕᕗᑦ… ᐃᒻᒥᓂᒃ ᑐᓂᒍᓐᓇᕋᑦᑕ ᐃᓅᓯᑦᓯᐊᖑᓂᕐᓴᖔᒥᒃ ᐱᒐᓱᓪᓗᑕ ᐃᑲᔪᕐᑕᐅᕕᑦᓴᓄᓪᓗ ᑐᓂᖃᑦᑕᓗᑕ ᑲᖕᖑᓱᒍᑎᒋᒍᓐᓀᓗᒋᑦ ᐃᓅᓯᑦᑎᓂ ᐃᓱᐃᓗᑕᕗᑦ. ᑕᒪᒃᑯᐊ ᐱᑦᔪᑎᒋᑦᓱᒋᑦ ᐅᖄᖏᓐᓇᓲᖑᕗᖓ ᐃᓄᓐᓂᒃ ᑫᓪᓚᑐᐃᒐᓱᑦᓱᖓ ᐊᓯᑦᔨᒍᓐᓇᖁᓪᓗᒋᑦ.

ᑭᓇᓕᒫᒃᑯᑦ ᐱᒐᓱᒍᓐᓇᓂᖃᑦᓯᐊᑐᐃᓐᓇᐅᕗᑦ. ᓄᑭᖃᑦᓯᐊᑐᐃᓐᓇᐅᒐᑦᑕ ᐃᓚᖏᑎᒍᓪᓗ ᓄᑭᖃᑦᓯᐊᖏᓐᓇᑐᐃᓐᓇᐅᓇᑕ. ᐃᓄᐃᑦ ᐊᑐᓂᑦ ᐊᑦᔨᒌᖕᖏᒪᑕ, ᑭᓯᐊᓂ ᑐᖕᖓᓂᖃᑦᓯᐊᑐᐊᕋᑦᑕ ᓄᑭᖃᑦᓯᐊᓂᕐᓴᐅᒍᓐᓇᑐᒍᑦ. ᐃᓄᐃᑦ ᐃᓅᓯᕐᒥᓂ ᐱᑦᓯᐊᕋᓱᑦᑐᑦ ᑭᖕᖒᒪᓇᕐᑐᒪᕆᐅᔪᑦ, ᖃᓄᐃᖕᖏᓯᐊᕐᓇᑐᒥᒃ ᐃᓅᓯᖃᕐᓗᑕ, ᓂᑦᔮᒍᓐᓇᓯᐊᕐᓗᑕ ᒪᒥᓴᕐᓂᖃᕐᓗᑕᓗ. ᑕᒪᒃᑯᐊᑕᒐ ᐱᒍᓐᓇᓂᕗᑦ. ᓄᓇᕕᒻᒥᐅᑦ ᐊᖏᔪᒥᒃ ᐊᖕᖏᐊᓂᖃᕐᒪᑕ, ᐱᐅᓂᖃᑦᓯᐊᒥᑦᓱᓂᓗ. ᐃᓱᐊᕐᓂᓴᕐᑕᖃᕐᓱᓂ ᑭᓯᐊᓂ ᐃᓚᖓᓂᒃ ᐅᖁᒣᓪᓕᐅᕈᑎᕗᑦ ᐅᖁᒣᓐᓂᓴᐅᕙᑦᑐᑦ. ᓇᒻᒪᑐᓪᓗ ᓈᒻᒪᖏᑦᑐᓗ ᓲᕐᓗ ᓇᓪᓕᖁᐊᕇᓕᕐᖃᔭᕋᑎᒃ ᐅᕕᖓᔪᑐᑦ ᐱᒻᒪᓂᒃ.

ᐃᓄᑐᐃᓐᓀᑦ ᐊᑑᑎᓯᒪᕗᑦ ᖃᓪᓗᓈᓄᑦ ᐃᓅᓯᕐᒥᓂᒃ ᐊᓯᑦᔨᔭᐅᔨᐊᖃᕐᓂᒥᒃ, ᖃᓄᑐᐃᓐᓇᓕᒫᖅ, ᑕᒪᒃᑯᐊᓗ ᐊᓂᒍᕐᓯᒪᓕᕋᓗᐊᕐᓱᑎᒃ, ᐅᓪᓗᒥ ᓱᓕ ᓱᕐᕃᓂᖃᕐᓯᒪᕗᑦ. ᓲᕐᓗ ᑌᒃᑯᐊ ᐱᐊᕋᐅᑦᓱᑎᒃ ᐊᓂᕐᕋᒥᓂᑦ ᓅᑕᐅᕙᑦᑐᕕᓃᑦ ᐃᓕᓐᓂᐊᕆᐊᕐᑎᑕᐅᑦᓱᑎᒃ ᑖᒃᑯᐊ ᐋᓐᓂᓯᒪᒻᒪᕆᑦᑐᑦ ᓯᖁᑦᑎᓯᒪᑦᓱᑎᓪᓗ, ᐃᓚᖏᓪᓗ ᐱᓇᓱᒍᑎᑦᓴᖃᖃᑦᑕᓯᒪᖕᖏᓚᑦ ᑕᒪᑐᒥᖓ ᐋᓐᓂᓯᒪᓂᕐᒥᒃ ᒪᒥᓴᕈᑎᑦᓴᓂᒃ ᐋᕐᕿᒍᑎᑦᓴᑖᕋᑕᕋᑎᒃ ᕿᑐᕐᖏᐅᓯᓚᐅᔪᒻᒥᔪᑦ. ᑌᒃᑯᐊ ᐋᓐᓂᓯᒪᒍᑎᖏᑦ ᑭᖑᕚᒥᓐᓅᔭᑲᓪᓛᓯᒪᔭᖏᑦ.

ᑭᓯᐊᓂᓕ ᑎᒍᒋᐊᖃᕐᐸᕗᑦ ᓇᒻᒥᓂᕐᑖᕆᓗᒋᑦ ᐅᓪᓗᒥ ᐃᓅᓯᑦᑎᒍᑦ. ᖃᐅᔨᒪᑐᐊᕈᕕᑦ ᐊᓯᑦᔨᒋᐊᖃᕆᐊᒥᒃ ᐱᒐᓱᐊᓕᕆᑦ, ᓴᐱᕐᑌᑐᓗᑎᑦ ᐃᓅᓯᕐᓂ ᓱᕐᖃᔭᖕᖏᓇᒫᕐᓂᒥᒃ ᓴᒃᑯᐃᓗᑎᑦ. ᐃᓅᓕᕆᓪᓕ ᐃᓅᓯᑦᓯᐊᖃᕐᓗᑎᑦ, ᖃᓄᑐᐃᓐᓇᓗ ᐱᒐᓱᕝᕕᓴᓂᒃ ᐊᓐᓀᑲᑕᒍᓐᓀᓕᕆᑦ, ᐃᓅᓯᕐᓂ ᐱᑦᓯᐊᓂᖃᓕᕆᑦ. ᐃᓘᓐᓇᑕ ᐱᔪᓐᓇᓂᖃᕋᑦᑕ ᐱᑦᔪᑎᑦᓴᖃᕐᓱᑕᓗ, ᑕᒪᒃᑯᐊ ᖁᕕᐊᓱᖕᖏᑑᒍᑎᒃᑲ ᐃᓄᐃᑦ ᐊᕐᓱᕉᓴᖏᓐᓇᓕᒫᕐᓱᑎᒃ ᐱᔭᕋᓕᑦᓱᑎᒃ ᐃᓅᑐᐃᓐᓇᐸᓐᓂᖏᑦ.

ᐊᑯᓂᐊᓗᒃ ᐱᔭᕋᓕᓯᒪᕗᖓ ᖃᐅᔨᒪᓯᒪᖕᖏᓇᒪ ᐊᓯᐊᓂᒃ ᐅᓪᓗᐃᑦ ᐃᓚᖓᓐᓂ ᑐᐸᑦᔫᒥᑲᓪᓚᓯᒪᕗᖓ “ᐊᑏ ᐆᑦᑐᓚᐅᕐᓚᖓᓕᕋᑕᕋᒪ ᖃᓄᐃᑦᑑᒪᖔᑦ ᖃᐅᔨᓂᐊᕋᒪ”. ᓴᐱᕐᑌᑐᒋᐊᖃᕐᓇᑐᖅ, ᑭᓯᐊᓂ ᐃᓘᓐᓇᑕ ᓴᐱᕐᑌᓕᒪᒍᓐᓇᐅᑎᓕᓐᓇᐅᔪᒍᑦ, ᖃᐅᔨᒪᖕᖏᑐᐃᓐᓇᑐᒍᑦ ᑌᒣᑦᑐᒍᓐᓇᓂᕐᒥᒃ. ᑕᒪᒃᑯᐊ ᐱᑦᔪᑎᒋᑦᓱᒋᑦ ᐅᖄᕙᑉᐳᖓ. ᐃᓄᐃᑦ ᑫᒥᑦᓯᒋᐊᕐᑐᓭᓪᓕᐅᑐᐃᓐᓇᓯᐊᕐᒪᑕ. »

Back to Top