Skip to Main Contents

ᓄᓇᙳᐊᑦ | ᐃᓕᑕᕆᔭᐅᓂᕐᑖᑐᑦ | ᖃᐅᔨᒋᐊᕐᕕᒋᑎᒍᑦ | Français | English

Allen Gordon driving a motorized boat. In the background one can see a jetty of stone belonging to a marina in Kuujjuaq.

ᓇᓗᓀᕐᑕᐅᔪᑦ

ᐋᓚᓐ ᑯᐊᑕ

ᐱᐅᓯᑐᙯᑦ ᓯᓚᕐᔪᐊᖅ ᐊᓯᑦᔨᐸᓪᓕᐊᑎᓪᓗᒍ • ᐋᓚᓐ ᑯᐊᑕ

Allen Gordon, seen from an opening on the roof of an igloo that he is building. One can see inside the igloo the entrance door.

ᐋᓚᓐ ᑯᐊᑕ

ᐋᓚᓐ ᑯᐊᑕ ᓄᓇᕕᒻᒥ ᐊᖁᐃᒪᔪᓕᕆᔩᑦ ᑲᑐᑦᔨᖃᑎᒌᓐᓂᐅᑉ ᐳᕐᑐᓂᕐᓴᖏᑦᑕ ᑲᑎᒪᔨᖏᓐᓄᑦ ᐃᓚᒋᔭᐅᔪᖅ. ᐃᓅᓱᑦᑑᓱᓂ ᐊᐅᓚᔨᔭᒥᓂᒃ ᐅᓂᒃᑳᓚᐅᔪᖅ, ᖃᓄᖅ ᐃᓅᓯᖅ ᐊᓯᑦᔨᓯᒪᓕᕐᓂᖓᓂᒃ ᐅᓂᒃᑳᓱᓂ ᐱᐊᕋᓚᐅᕐᓯᒪᑎᓪᓗᒍ, ᐅᓂᒃᑳᓱᓂᓗ ᓂᕿᑐᐃᓐᓀᑦ ᐃᓄᐃᑦ ᓂᕆᓲᖏᑦ ᐱᒻᒪᕆᐅᓂᖏᓐᓂᒃ.

ᐱᕈᕐᓴᑎᓗᖓ ᐊᒥᓱᒻᒪᕆᐊᓗᐃᑦ ᐊᓯᑦᔨᓯᒪᕗᑦ, ᐱᐅᓯᑐᖃᕗᑦ ᐱᒋᐊᕐᕕᒋᑦᓱᒍ ᐃᓕᓐᓂᐊᓂᖅ ᑎᑭᑦᓱᒍ. ᐊᓯᑦᔨᐸᓪᓕᐊᕉᑕᕆᑎᓪᓗᒍ ᐃᓅᓯᕗᑦ ᐱᕈᕐᓴᓯᒪᔪᖓ. ᔦᒥᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᒃ ᐊᑎᓕᐅᕈᑕᐅᒻᒪᑦ 1975-ᒥ ᐃᓅᓯᕐᑎᓂᒃ ᐊᓯᑦᔩᒪᕆᓚᐅᕐᓯᒪᔪᖅ ᐊᑯᓂᐅᙱᑐᐊᐱᒃ. ᐅᑦᑑᑎᒋᓗᒍ, ᐃᓕᓐᓂᐊᓂᕐᒪ ᐊᕝᕙᓗᐊᓕᒫᖓᓂᒃ ᐱᔭᕆᕐᓂᐅᔭᙲᓈᕐᑎᓗᖓ ᓱᓕ, ᐃᓄᒃᑎᑐᑦ ᐃᓕᓐᓂᐊᑎᑕᐅᒍᓐᓇᓯᓚᐅᕐᓯᒪᔪᒍᑦ, ᐃᓄᒃᑎᑐᑦ ᐃᓕᓐᓂᐊᑎᑕᐅᒍᓐᓇᖃᑦᑕᓚᐅᕐᓯᒪᒐᑕ ᓯᕗᓂᐊᖓᒍᑦ. ᐃᓕᓐᓂᐊᕆᐊᙵᓯᑦᓱᑕ ᐃᓄᒃᑎᑐᑦ ᐱᒋᐊᑦᓴᐅᑎᒋᓐᓂᖏᒋᐊᒥᒃ ᐊᕐᓱᕈᓐᓇᑑᓚᐅᕐᓯᒪᔪᖅ. ᐱᒍᑦᔭᐅᒍᑎᕗᑦ ᐊᓯᑦᔨᓯᒪᒻᒪᕆᓕᕐᑐᑦ. ᑰᑦᔪᐊᒥ ᐱᕈᕐᓴᑎᓪᓗᖓ ᖁᕐᕕᖃᖃᑦᑕᓚᐅᕐᓯᒪᔪᒍᑦ ᐅᓪᓗᑕᒫᑦ ᑯᕕᒋᐊᕐᑐᓗᒋᑦ ᐊᓂᒋᐊᖃᕐᑕᑎᓐᓂᒃ, ᐱᕐᓯᑐᐊᓘᒐᓗᐊᕐᒪᑦ. ᐱᐊᕂᑦ (ᑲᒃᑲᓛᑦ) ᐅᓪᓗᒥ ᑕᑯᓐᓇᖑᐊᕐᖃᔭᙱᑐᓪᓘᓃᑦ ᑯᕕᒍᑎᓕᒻᒥᒃ ᐃᒪᖃᐅᑎᖃᕐᐸᓚᐅᙱᓂᑦᑎᓂᒃ, ᐊᑕᐅᓯᐊᓗᒻᒥᒃ ᐃᒪᖃᐅᑎᖃᕐᐸᓚᐅᕐᑐᒍᑦ ᐊᑕᐅᓯᕐᒥᒃ ᑯᕕᒍᑎᓕᒻᒥᒃ. ᑌᒫᒃ ᐃᒪᖃᕐᐸᓚᐅᕐᑐᒍᑦ ᐊᒻᒪᓗ ᓂᕈᒥᑦᓯᓰᒍᒪᓕᑐᐊᕋᑦᑕ ᐅᒃᑯᓯᐊᓗᒻᒧᑦ ᑭᐊᑦᓴᐅᑎᐅᑉ ᖄᖓᓄᕐᓱᒍ ᓂᕈᒥᑦᓯᓰᕙᓚᐅᕐᑐᒍᑦ. ᐊᖓᔪᒃᑲᓕ ᐅᕙᓐᓂᑦ ᐊᕐᓱᕈᓐᓇᑐᒃᑰᓂᕐᓴᐅᓯᒪᒻᒥᔫᒃ ᐱᕈᕐᓴᓱᑎᒃ. ᐅᕐᓱᖃᓲᓂᒃ ᑭᐊᑦᓴᐅᑎᖃᕋᑕᕐᓯᒪᙱᒪᑦ ᑌᑦᓱᒪᓂ, ᕿᔪᑦᑐᓲᓂᒃ ᑭᐊᑦᓴᐅᑎᖃᕐᐸᓚᐅᕐᑐᐃᓕ ᐅᕐᖂᓯᓴᐅᑎᒋᑦᓱᒍ ᐃᓪᓗᒥᓂᒃ. ᑌᑦᓱᒪᓂᓕ ᓱᒃᑯᓗᐊᙳᐊᓂᕐᒥᔪᑦ. ᑭᓇᒥᓪᓘᓃᑦ ᓯᑭᑑᖃᕐᑐᖃᑦᔭᑎᓐᓇᒍ, ᕿᒻᒥᓄᑦ ᕿᒧᑦᓯᓲᖑᑦᓱᑎᒃ ᑕᐃᒣᑦᑐᒥᒃ ᐃᓅᓯᖃᕐᐸᓚᐅᕐᑐᑦ.

ᑌᑦᓱᒪᓂᓗ ᐃᓄᒻᒪᕇᑦ ᓲᓱᒋᔭᐅᑦᓯᐊᓂᕐᓴᐅᓯᒪᑦᓱᑎᒃ. ᐱᕈᕐᓴᑎᓪᓗᖓᓕ ᐊᒥᓱᒻᒪᕆᐊᓗᓐᓂᒃ ᐱᐅᓯᑐᖃᕐᑎᒍᑦ ᐊᑑᑎᔭᐅᖁᔭᐅᙱᑐᓂᒃ ᒪᓕᒐᖃᕐᐸᓚᐅᕐᑐᒍᑦ. ᐅᑦᑑᑎᒋᓗᒍ, ᐃᓄᒻᒪᕆᓐᓄᑦ ᑕᕐᕿ ᐃᓗᐃᒃᑑᓱᓂ ᐊᒻᒪᓗᑭᑖᑦᓯᐊᒍᓕᑐᐊᕐᒪᑦ ᑕᑯᓐᓇᖁᔭᐅᕙᓚᐅᙱᑐᒍᑦ ᐅᖃᐅᑎᔭᐅᕙᑦᓱᑕ ᐃᒫᒃ; "ᑕᕐᕿ ᑕᑯᓐᓇᓂᐊᙱᓓᑦ ᐃᔨᒃᑭᒃ ᐊᑯᓐᓂᖓᒍᑦ ᖃᕐᔪᒧᑦ ᐱᑎᑦᑕᐅᓴᕈᐊᕋᕕᑦ." ᓚᔭᐅᕙᓚᐅᕐᑐᒍᑦ. ᑌᒪᐃᑦᑐᐃᑦ ᒥᑭᔪᙳᐊᓗᑳᖑᑦᓱᑎᒃ ᐊᑐᕐᑕᐅᖁᔭᐅᙱᑑᖃᑦᑕᓯᒪᔪᐃᑦ ᐃᓄᓐᓄᑦ ᐱᕈᕐᓴᑎᓪᓗᒋᑦ ᐃᓘᓐᓇᑎᒃ ᐊᓯᑦᔨᕆᐊᑲᓪᓚᓯᒪᔪᑦ. ᐊᒥᓱᐊᓗᓐᓂᒃ ᐅᓂᒃᑳᑐᐊᓂᒃ ᐊᓯᐅᔨᓯᒪᓕᕐᑐᒍᑦ ᑐᓵᕙᓚᐅᕐᑕᑎᓐᓂᒃ ᐊᖁᐃᒪᑦᓱᑕ ᐅᓐᓄᐸᓪᓕᐊᓕᑐᐊᕐᒪᑦ.

ᐱᕈᕐᓴᑎᓪᓗᖓ, ᑕᓚᕖᓭᑦ ᑎᑭᓚᐅᕐᑎᓇᒋᑦ 1979-ᒥ ᑎᑭᓚᐅᕐᓯᒪᒻᒪᑕ, ᐃᓄᐃᑦ ᐃᓘᓐᓇᑎᒃ ᒪᙯᖃᑦᑕᓯᒪᔪᑦ ᐆᒪᔪᕐᓯᐅᓱᑎᒃ. ᐅᑭᐊᑦᓴᐅᓕᕐᒪᑦ ᐃᓕᓐᓂᐊᕆᑐᐊᕋᑦᑕ ᒥᑭᒋᑦᔨᒋᐊᕐᑐᖃᑦᑕᓚᐅᕐᓯᒪᔪᒍᑦ ᑎᒻᒥᐊᓂᓗ ᐆᒪᔪᕐᓂᐊᓲᖑᑦᓱᑕ. ᐅᓪᓗᒥ ᑕᐃᒣᓲᖑᖏᓐᓈᑑᒐᓗᐊᑦ ᑭᓯᐊᓂ ᐃᑭᓐᓂᓭᑦ ᑌᒣᓲᖑᓕᕐᑐᑦ ᐱᕈᕐᓴᓚᐅᕐᓯᒪᑎᓪᓗᖓ. ᐅᓪᓗᒥ ᐊᒥᓱᐊᓗᓐᓂᒃ ᒪᙯᑦᑎᖃᖏᓐᓈᑑᒐᓗᐊᖅ ᑭᓯᐊᓂ ᐱᐊᕂᑦ (ᑲᒃᑲᓛᑦ) ᐃᑭᓐᓂᓭᑦ ᐅᓪᓗᑕᒫᑦ ᑌᒣᓱᒍᐃᓐᓈᑐᒐᓗᐊᑦ, ᐊᒥᓱᒻᒪᕇᑦ ᐱᔭᑦᓭᑦ ᓄᐃᑕᓕᕐᒪᑕ ᐃᓅᓯᑦᑎᓂ, ᐅᑦᑑᑎᒋᓗᒋᑦ ᖃᕆᑕᐅᔦᑦ. ᓱᓇᒐᓓᑦ ᐊᓯᑦᔨᓯᒪᓪᓚᕆᓕᕐᑐᑦ ᐃᓅᓯᑦᑎᓂᒃ.

ᐅᓪᓗᒥ, ᓂᕿᑐᐃᓐᓀᑦ ᐃᓄᐃᑦ ᓂᕿᒋᓲᖏᑦ ᐱᒻᒪᕆᐅᓂᕐᐸᐅᖏᓐᓇᑐᑦ ᐃᓄᓐᓄᑦ, ᓱᓇᒐᓓᑦ ᓱᑲᑦᑐᐊᓗᒻᒥᒃ ᐊᓯᑦᔨᐸᓕᐊᔪᐊᓘᒐᓗᐊᕐᑎᓗᒋᑦ, ᑭᓯᐊᓂ ᐱᐊᕂᑦ (ᑲᒃᑲᓛᑦ) ᓂᕿᑐᐃᓐᓇᓂᒃ ᐱᒍᒪᓪᓕᓲᖑᖏᓐᓇᑐᑦ. ᐅᑦᑑᑎᒋᓗᒍ, ᐃᕐᓂᕋ ᐃᖃᓗᑉᐱᓂᒃ ᑐᒃᑐᕕᓂᕐᓂᓗ ᖁᐊᕐᑐᕈᒪᓪᓕᓲᖅ, ᑌᒫᑦᓭᓇᖅ ᓇᐅᑐᐃᓐᓇᖅ ᐱᐅᓯᑐᖃᕐᒥᑎᒍᑦ ᓂᕆᓲᕕᓂᕐᒥᓂᒃ ᐱᕈᕐᓴᓱᓂ ᐱᒍᒪᓪᓕᓲᒍᒻᒪᑕ ᑌᒣᑐᐃᓐᓇᒥᔪᑦ. ᐱᒍᒪᓪᓕᓲᑦ. ᓂᕿᕗᑦ ᑭᓇᐅᓂᑦᑎᓄᑦ ᐱᐅᓯᑐᖃᕐᑎᒍᑦ ᐃᓚᒋᔭᐅᓪᓚᕆᑦᑐᑦ, ᓄᓇᓕᒻᒥᐅᓕᒫᑦ ᓂᕆᒻᒫᓂᖃᓲᖑᒻᒥᔪᑦ, ᐅᑦᑑᑎᒋᓗᒍ ᕿᑐᙱᒥ (ᖁᕕᐊᓱᕝᕕᒥ) ᑐᒃᑐᕕᓂᕐᓂᒃ ᐃᖃᓗᑉᐱᓂᒃ ᒪᑦᑕᓂᒃ ᖁᐊᕐᑐᓱᑎᒃ... ᐱᐅᓯᕗᑦ ᑕᒪᓐᓇ. ᓄᓇᒥ ᐃᓅᒐᓱᐊᕐᕕᖃᓲᒍᓂᕗᑦ ᐱᒻᒪᕆᐊᓘᖏᓐᓇᑐᑦ ᐅᕙᑦᑎᓄᑦ. ᐊᒥᓱᒻᒪᕆᐊᓗᐃᑦ ᐃᓄᐃᑦ ᓄᓇᒥ ᐃᖃᓗᓐᓂᐊᓱᑎᒃ ᒪᙯᓲᖑᖏᓐᓇᑐᑦ ᐆᒪᔪᕐᓯᐅᓱᑎᒃ. ᐱᐅᒃᑯᑎᕗᑦ ᐊᓯᑦᔨᓯᒪᓪᓚᕆᓕᕋᓗᐊᕐᑎᓗᒋᑦ ᐅᓪᓗᒥᐅᓕᕐᑐᖅ ᐅᒥᐊᖃᓲᖑᓕᕋᑦᑕ ᐊᐅᓚᐅᑎᓕᓐᓂᒃ ᓯᑭᑑᓂᓗ. ᑭᓯᐊᓂ ᐊᑖᑕᑦᓯᐊᑯᕗᑦ ᐊᓯᖏᓪᓗ ᐃᓄᐃᑦ ᓯᕗᓪᓕᕕᓂᕗᑦᑕ ᐊᑐᖃᑦᑕᑕᕕᓂᖏᓐᓂᒃ ᐊᑐᓲᖑᖏᓐᓈᑐᒍᑦ ᐅᓪᓗᒥᐅᔪᖅ.

ᔦᒥᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᒃ ᐊᑎᓕᐅᕈᑕᐅᓚᐅᕐᓯᒪᔪᖅ ᐱᒍᓐᓇᐅᑎᒋᔭᑦᑎᓂᒃ ᓴᐳᒻᒥᒋᐊᕈᑎᐅᑦᓱᓂ ᑭᓯᐊᓂ ᐊᖏᔪᐊᓗᒻᒥᒃ ᓴᒃᑯᓯᓯᒪᒻᒥᔪᒍᑦ ᑌᑰᓇ. ᓄᓇᓕᒻᒥᐅᒍᓂᕐᓴᐅᓚᕿᑎᑕᐅᓯᒪᔪᒍᑦ, ᓄᓇᒥᐅᒍᙱᓂᕐᓴᐅᓯᑦᓱᑕ. ᑕᒪᓐᓇᓕ ᓇᒻᒥᓂᖅ ᐃᓱᒪᒋᔭᕋ. ᐱᔭᑦᓴᒥᒃ ᐱᓇᓲᑎᑦᓴᒥᒃ ᑭᙴᒪᓇᕐᑐᖅ ᐃᓚᒌᑦᑐᑦ ᓄᓇᒦᓚᕿᐅᑎᒋᒍᓐᓇᐅᑎᑦᓴᖓᓂᒃ ᐱᑕᖃᕈᒥᓇᕐᑐᖅ. ᐃᓄᐃᑦ ᓄᓇᓕᖏᑦ ᐊᑐᓂ ᐆᒪᔪᕐᓂᐊᑎᓂᒃ ᓴᐳᒻᒥᔨᖁᑎᖏᑦ ᖁᐊᖃᐅᑎᖃᕐᑐᑦ ᐅᕝᕙᓘᓐᓃᑦ ᓄᓇᓕᐅᑉ ᖁᐊᖃᐅᑎᖓᓂᒃ ᐊᒻᒪᓗ ᑐᒃᑐᖃᕉᑕᕆᓕᑐᐊᕐᒪᑦ ᓄᓇᓕᐅᑉ ᓴᓂᐊᓂ ᐆᒪᔪᕐᓯᐅᑏᑦ ᓂᐅᕐᕈᑎᖃᕈᓐᓇᓲᑦ ᖁᐊᖃᐅᑎᒧᑦ ᐃᓄᐃᑦ ᐁᑦᓯᒍᓐᓇᓚᖓᑎᓪᓗᒋᑦ ᒍᒪᓕᐊᕈᑎᒃ. ᐃᓪᓗᓕᒫᕋᓗᐃᑦ ᐆᒪᔪᕐᓯᐅᑎᓂᒃ ᐱᑕᖃᕐᑐᐃᓇᐅᑦᔭᖏᒻᒪᑕ, ᐱᓗᐊᕐᑐᖅ ᐃᓄᒻᒪᕇᑦ ᐅᕝᕙᓘᓐᓃᑦ ᐅᐃᒡᒐᓃᑦ, ᓇᑯᕐᑐᒪᕆᐊᓗᒃ ᓄᓇᓖᑦ ᖁᐊᖃᑕᐅᑎᖃᕐᓂᖏᓐᓄᑦ ᓂᕿᑐᐃᓐᓇᓄᑦ ᐊᑐᐃᓐᓇᐅᕕᐅᒍᓐᓇᒪᑕ, ᐊᑭᖃᑦᔭᖏᑦᑐᓂᒃ. ᑭᓯᐊᓂ ᐃᓚᖓᒍᑦ ᐃᓄᐃᑦ ᐃᓚᖏᑦ ᓂᕿᑐᐃᓐᓇᓂᒃ ᐊᑐᐃᓐᓇᖃᑦᓴᓕᕋᒥᒃ ᑮᑕ (ᐅᓐᓃᓄᓇ) ᓄᓇᓕᒻᒦᑲᓪᓚᑐᐃᓐᓇᓲᑦ ᓄᓇᒦᙱᖔᕐᓱᑎᒃ ᐊᒻᒪᓗ ᐃᒻᒥᓂᕐᓱᓯᐊᙱᖔᕐᓱᑎᒃ.

ᐆᒪᔪᕐᓯᐅᑏᑦ, ᐃᑲᔪᕐᓯᔭᐅᒍᓐᓇᓲᖑᒻᒥᔪᑦ ᓂᐅᕕᕋᓱᐊᓕᑐᐊᕐᒪᑕ ᐱᐅᒃᑯᑎᓂᒃ ᑭᙴᒪᒋᔭᖏᓐᓂᒃ, ᐅᑦᑑᑎᒋᓗᒋᑦ, ᕿᔪᓐᓂᒃ ᖃᒧᓯᐅᕈᑎᑦᓴᓂᒃ. ᓄᓇᓕᐊᕈᐃᑦ ᐊᑐᓂᑦ ᐆᒪᔪᕐᓂᐊᑎᖁᑎᖃᕐᑐᑦ ᓇᒻᒥᓂᖅ ᑲᒪᒋᔭᒥᓂᒃ. ᑮᓇᐅᔦᑦ ᐃᓚᖏᑦ ᓴᓂᕐᕙᑕᐅᒪᓲᑦ ᐅᐃᒪᓇᕐᑐᖃᓕᕐᐸᑦ ᐊᑐᕐᑕᐅᒍᒫᕐᓂᐊᑐᓂᒃ. ᐊᓯᐅᒪᔪᖃᕐᓂᐸᑦ ᐃᑲᔪᕐᑕᐅᔭᕆᐊᖃᕐᑐᖃᕐᐸᓘᓐᓃᑦ, ᑳᓴᓖᑦ ᐊᒻᒪᓗ ᐱᐅᒃᑯᑏᑦ ᐊᑐᐃᓐᓇᐅᑎᑕᐅᓲᑦ ᐊᓐᓇᑐᐃᒋᐊᕐᑐᕈᑎᑦᓴᓂᒃ.

Back to Top