Skip to Main Contents

ᓄᓇᙳᐊᑦ | ᐃᓕᑕᕆᔭᐅᓂᕐᑖᑐᑦ | ᖃᐅᔨᒋᐊᕐᕕᒋᑎᒍᑦ | Français | English

Historical photo of an elderly woman sitting in front of a plate-shaped stone oil lamp that is controlled using a long stem.

ᓇᓗᓀᕐᑕᐅᔪᑦ

(ᖃᓪᓗᓈᕐᑎᑑᕐᑐᐃᓐᓇᑐᑦ) Woman in front of a qulliq lamp, Library and Archives Canada, PA-147309

ᐃᓄᒻᒪᕇᑦ ᓯᓚᑐᓂᖓ

ᒥᐊᔨ ᑭᐊᑌᓐᓇᖅ, ᐃᓄᓗᒃ ᕿᓰᖅ, ᒫᑕ ᑐᓂᖅ ᐊᒻᒪᓗ ᓕᓯ ᐃᕐᓂᖅ, ᐃᓘᓐᓇᑎᒃ ᑖᒃᑯᐊ ᑲᖏᕐᓱᔪᐊᒥ ᐃᓄᒻᒪᕇᑦ ᐊᓂᕐᕋᖓᓂᒥᐅᑦ. ᐱᐊᕋᐅᓂᕐᒥᓂ ᐱᕈᕐᓴᓂᕕᓂᕐᒥᓂᒃ ᐅᓂᒃᑳᓚᐅᔪᑦ ᐊᕐᓱᕈᓐᓇᑐᒃᑰᖃᑦᑕᕕᓂᕐᒥᓗ ᐅᓂᒃᑳᓱᑎᒃ, ᕿᒧᑦᓯᓲᖑᑦᓱᑎᒃ ᐊᐅᓚᔨᔭᒥᓂᒃ, ᐃᓄᒃᑎᑐᓪᓗ ᐃᓄᐃᑦ ᐅᖃᐅᓯᖓ ᐱᒻᒪᕆᐊᓂᖓᓂᒃ, ᓂᕿᑐᐃᓐᓀᓗ ᒥᑦᓵᓄᑦ ᐅᓂᒃᑳᓱᑎᒃ ᐊᒻᒪᓗ ᖃᐅᔨᒪᔭᒥᓂᒃ ᑭᖑᕚᒥᓄᑦ ᖃᐅᔨᒪᔭᐅᖁᔭᒥᓂᒃ ᐅᖄᖃᑦᑕᓱᑎᒃ.

Mosaic of portraits of four elder women, smiling.

ᒫᑕ ᑐᓂᖅ, ᒥᐊᔨ ᑭᐊᑌᓐᓇ, ᐃᓄᓗᒃ ᕿᓰᖅ, ᓕᓯ ᑐᓂᖅ

ᐃᓄᓗᒃ ᕿᓰᖅ
ᓴᓪᓗᐃᓗ ᑲᖏᕐᓱᔪᐊᓗ ᐊᑯᓐᓂᖓᓂ ᐃᓅᓕᕐᑐᕕᓂᐅᕗᖓ ᑳᓐᓇᑐᐊᓘᑎᓪᓗᒍ, ᓂᕿᖃᙱᑐᐊᓘᑎᓪᓗᒍ. ᖃᓄᖅ ᐊᖓᔪᖅᑳᑲᓄᑦ ᐱᕈᐃᔭᐅᓚᐅᕐᓂᒪᖔᕐᒪ ᖃᐅᔨᒪᑦᔭᖏᑦᑐᖓ ᐊᕐᕌᒍᐃᑦ ᑳᓐᓇᑐᐊᓘᓂᖏᓐᓂ ᐱᕈᕐᓴᔭᐅᓐᓂᕋᒪ. ᐊᕐᓱᕈᓐᓇᑐᐊᓘᓯᒪᔪᖅ ᑳᓐᓇᑐᐊᓘᓂᖓᓂ. ᐊᖓᔪᖃᕐᑐᕕᓂᐅᒐᓗᐊᕐᑐᖓ ᑭᓯᐊᓂ ᐊᐅᓚᔨᙱᑖᒃᑲ, ᑐᖁᓚᐅᕐᓯᒪᒻᒪᑕ ᐃᓅᓱᑦᑐᐊᐱᐅᑎᓪᓗᒍ, ᑳᓐᓇᒨᕐᖂᑐᖅ ᐃᓅᒍᓐᓀᑐᕕᓃᑦ. ᐊᖓᔪᕐᖃᕋᓗᐊᕐᑐᖓ ᑕᒫᓂ ᑲᖏᕐᓱᔪᐊᒥ, ᑎᒍᐊᕐᑖᖑᓚᐅᕐᑐᕕᓂᕐᒥᑦ. ᐊᓂᒐᓗ ᐃᓅᒍᓐᓀᖃᒻᒥᓚᐅᔪᑦᓱᓂ ᒫᓐᓇᖃᒻᒥᒐᓛᒃᑯᑦ ᐊᕐᕌᒍᐃᑦ ᐊᒥᓲᙱᑐᑦ ᓈᓕᕐᑐᑦ ᐃᓅᒍᓐᓀᓚᐅᔪᑎᓪᓗᒍ ᖃᔭᕆᐊᕐᑐᓱᑎᒃ ᐱᓂᕐᓗᓱᑎᒃ ᐃᓅᒍᓐᓀᓯᒪᔪᖅ.

ᑳᓐᓇᑐᐊᓘᑎᓪᓗᒍ, ᐊᓈᓇᒐ ᐊᖓᔪᒐᓂᒃ ᓂᕆᒃᑫᕙᓚᐅᕐᑐᖅ ᐅᕐᓱᓂᒃ, ᐳᐃᔨᕕᓂᐅᑉ ᕿᓚᓗᒐᕕᓂᐅᓪᓘᓃᑦ ᐅᕐᓱᖓᓂᒃ, ᕿᔪᒻᒦᑎᓪᓗᒍ ᒥᓪᓗᐊᑎᑦᓱᒍ ᐅᕐᓱᑎᒥᑦ. ᓂᕆᒐᑦᓴᖃᑦᔭᖏᒻᒪ ᐊᓯᐊᓂᒃ, ᐊᓈᓇᒐ ᓯᑯᒥᑦ ᖃᓂᕐᒥᓄᑦ ᐊᐅᑦᑎᓱᒍ ᐃᒥᕐᑎᓯᕙᓚᐅᕐᑐᖅ ᐅᕙᑦᑎᓂᒃ ᐱᐊᕋᕐᒥᓂᒃ.

ᓯᓚᕐᔪᐊᒥ ᐅᓇᑕᕐᓂᔪᐊᑦ ᑐᖓᓕᐊᓂᒃ ᐅᓇᑕᕐᓂᔪᐊᖃᕐᑎᓗᒍ ᑳᓐᓇᑐᐊᓘᓚᐅᕐᓯᒪᔪᖅ ᐃᓄᐃᑦ ᓄᓇᖓᓂ ᐅᑭᐅᕐᑕᑐᒥ. ᖃᓪᓗᓈᓕᒫᑦ ᐊᐅᓪᓚᑐᐊᓘᓚᐅᕐᓯᒪᒻᒪᑕ ᐅᓇᑕᕐᓂᔪᖃᓕᕐᒪᑦ. ᐅᓇᑕᕐᓂᖅ ᓄᕐᖃᓴᑐᐊᕐᒪᑦ ᐅᑎᕐᒥᓱᑎᒃ ᑕᒪᐅᖓ. ᐊᔪᕿᕐᑐᐃᔩᑦ ᑲᒻᐸᓂᒃᑯᓗ ᐅᑎᓚᐅᕐᓯᒪᔪᑦ ᓂᐅᕕᐊᑦᓴᒥᒃ ᐊᑦᔭᓯᒻᒪᑕ ᑳᓐᓇᕈᓐᓀᐸᓪᓕᐊᓕᓚᐅᕐᓯᒪᔪᖅ, ᐃᓅᓯᕗᓪᓗ ᐱᐅᓯᐅᒥᑦᓱᓂ. ᑌᒪᙵᓂᑦ ᐱᐅᓯᐅᒥᕙᓪᓕᐊᑐᐃᓐᓇᑐᖅ.

ᒫᑕ ᑐᓂᖅ
ᑲᖏᕐᓱᒥ ᐃᓅᓕᕐᑐᕕᓂᐅᕗᖓ, ᐱᕈᕐᓴᔭᐅᓯᒪᑦᓱᖓ ᓯᓚᕐᔪᐊᒥ ᐅᓇᑕᕐᓂᔪᐊᑦ ᑐᖓᓕᐊᓂᒃ ᐅᓇᑕᕐᓂᔪᐊᖃᕐᑎᓗᒍ. ᑳᓐᓇᑐᐊᓗᑎᓪᓗᒍ ᐃᓄᐃᑦ ᓄᓇᖓᓂ, ᓄᓇᕕᒻᒥ ᓄᓇᕘᒥᒐᓴᖅ, ᐃᒻᒪᖄ ᓛᐸᑐᐊᒐᓴᒻᒥ ᑳᓐᓇᑐᕐᔪᐊᖃᓚᐅᕐᓯᒪᒻᒪᑦ. ᕿᖕᒥᑎᓐᓂᒃ ᓂᕆᑐᐃᓐᓇᒧᑦ ᐃᓚᖓᓂ ᐊᓐᓇᓚᐅᕐᓯᒪᔪᒍᑦ. ᑐᖁᒋᐊᖃᓚᐅᕐᓯᒪᑦᔭᖏᑦᑕᕗᑦ ᕿᖕᒦᑦ ᑳᒧᑦ ᑐᖁᓚᐅᕐᓯᒪᒻᒪᑕ ᓂᕆᓚᐅᕐᓯᒪᔭᕗᑦ. ᑳᓐᓇᑐᐊᓘᑎᓪᓗᒍ ᕿᖕᒥᓄᑦ ᐃᓅᒍᓐᓇᓯᓯᒪᔪᒍᑦ. ᐊᕐᓱᕈᓐᓇᑐᕐᔪᐊᖑᓯᒪᔪᖅ.

ᐊᖓᔪᖅᑳᑎᓐᓄᑦ ᐅᖃᐅᑎᔭᐅᓚᐅᕐᓯᒪᔪᒍᑦ ᕿᖕᒥᓂᒃ ᓂᕆᒋᐊᖃᓕᕋᑦᑕ, ᑭᓯᐊᓂ ᒪᒪᑦᓯᐊᓚᐅᕐᓯᒪᙱᑐᖅ ᕿᖕᒥᓂᒃ ᓂᕆᒋᐊᒥᒃ. ᐅᖃᐅᑎᐅᔭᐅᖃᑦᑕᓚᐅᕐᓯᒪᔪᖓ "ᒫᓐᓇᐅᓂᖓᓂ ᕿᖕᒥᓂᒃ ᓂᕆᓚᐅᑲᓐᓂᐊᖁᒍᑦ, ᓂᕿᑦᓯᐊᖑᓂᕐᓴᓂ ᐱᑕᖃᓕᕐᐸᑦ ᓂᕆᐊᓗᖃᑦᑕᓛᕋᑦᑕ," ᑌᒣᓕᔭᐅᑦᓱᖓ.

ᐅᓇᑕᕐᓂᔪᐊᖅ ᐊᓂᒍᕐᒪᑦ, ᓱᓇᓕᒫᑦ ᐱᐅᓯᕙᓪᓕᐊᓯᓚᐅᕐᓯᒪᔪᑦ. ᑭᓯᐊᓂ ᖃᓪᓗᓈᑦ ᐅᑎᓕᕐᒥᒪᑕ, ᕿᖕᒦᑦ ᐊᒥᓱᙳᓕᐅᒥᒻᒪᑕ ᐊᐅᓚᒍᓐᓇᓯᐅᒥᓚᐅᕐᓯᒪᔪᒍᑦ. ᓯᕗᓕᕐᑎᕗᑦ, ᓯᕗᓕᕐᑎᖃᕐᐸᓚᐅᕋᑦᑕ, ᐱᓱᒋᐊᖃᕐᐸᓚᐅᕐᑐᖅ ᐅᖓᓯᑦᑐᐊᓗᒻᒧᑦ ᓂᕿᑦᓴᓯᐅᕆᐊᓱᓂ, ᕿᖕᒥᒋᓕᕐᓱᓂ ᐅᑎᕐᒪᑦ ᕿᖕᒥᓕᐅᕆᐊᓪᓚᓯᓚᐅᕐᓯᒪᔪᒍᑦ.

ᑭᖑᓂᒐᒍᑦ, ᐊᑖᑕᒐᓂᒃ ᒪᓕᖃᑦᑕᓕᓚᐅᕐᓯᒪᔪᖓ. ᐃᖃᓗᓐᓂᐊᕆᐊᕐᐸᓱᓄᒃ, ᐊᐅᓪᓛᓯᒪᕙᑦᓱᓄᓗ ᐊᒻᒪᓗ ᐆᒪᔪᕐᓯᐅᐸᑦᓱᓄᒃ ᕿᒧᑦᓯᑐᐃᓐᓇᑯᑦ. ᐊᖑᑏᑦ ᒪᙯᑎᐅᕙᓚᐅᕐᑐᑦ ᑭᓯᐊᓂ, ᐃᕐᓂᖃᙱᑐᐊᕋᒥᒃ ᐸᓂᒻᒥᓂᒃ ᒪᓕᑦᑎᖃᕐᐸᓚᐅᕐᑐᑦ. ᐊᑖᑕᒐ ᐃᕐᓂᖃᙱᓇᒥ, ᐊᖓᔪᑦᓯᐸᐅᑦᓱᖓᓘᕋᒪ ᒪᓕᑲᑦᑕᖏᓐᓇᐸᓚᐅᕐᑕᕋ ᐃᓅᓱᑦᑑᓱᖓ. ᒪᓕᑲᑦᑕᖏᓐᓇᖃᑦᑕᓚᐅᕐᓯᒪᔭᕋ ᑌᒪᙵᑦ, ᒪᙯᕐᖃᔦᕐᒪᑦ ᐃᓄᑐᖃᐅᓂᕐᒥᓄᑦ ᑭᓯᐊᓂ ᒪᓕᑲᑦᑕᕈᓐᓀᓯᒪᔭᕋ. ᑲᒪᒋᓕᓚᐅᔪᔭᕋ ᐃᓅᒍᓐᓀᖏᓐᓂᓕᒫᖓᓂ.

ᐃᓄᓗᒃ ᕿᓰᖅ
ᐊᑖᑕᒐᓂᓕ ᒪᓕᑲᑦᑕᐸᓚᐅᑦᔭᖏᓪᓚᖓ, ᒪᕐᕈᕕᑦᓱᖓ ᒪᓕᑦᓯᒪᔭᕋᓗᐊᕋ, ᐃᕐᓂᖃᓚᐅᕐᓯᒪᒻᒪᑦ.

ᒥᐊᔨ ᑭᐊᑌᓐᓇ, ᐃᓄᓗᒃ ᕿᓰᖅ, ᒫᑕ ᑐᓂᖅ, ᓕᓯ ᑐᓂᖅ
ᐊᖑᑏᑦ ᒪᙯᑉᐸᓚᐅᕐᑐᑦ ᕿᒧᑦᓯᓱᑎᒃ ᐱᓇᓱᐊᕈᓯᕐᓂ ᐱᖓᓱᓂ ᑕᕐᕿᓕᒫᒥᓘᓐᓃᑦ ᒪᙯᑉᐸᓱᑎᒃ. ᒥᑭᒋᐊᕐᓂᐊᓱᑎᒃ, ᐃᖃᓗᓐᓂᐊᓱᑎᒃ ᑐᒃᑐᓯᐅᕐᓱᑎᓗ. ᐅᐃᒪᒐᓛᒐᑎᒃ. ᐊᕐᓇᕙᓪᓗᐃᑦ ᐊᖁᐃᒪᕕᒻᒥᓃᓲᖑᑎᓪᓗᒋᑦ, ᐊᖑᑏᑦ ᐆᒪᔪᕐᓯᐅᓂᖏᓐᓂ.

ᐅᓄᕐᓂᖏᑦ ᐊᑦᔨᒌᑦᔭᖏᑦᑐᓂᒃ ᕿᖕᒥᖃᕐᐸᓚᐅᕐᑐᑦ. ᐊᖑᑏᑦ ᐃᓚᖏᑦ ᑕᓪᓕᒪᓂᒃ ᕿᖕᒥᖃᕐᐸᓚᐅᕐᑐᑦ ᐃᓚᖏᓪᓗ ᖁᓕᓐᓂᒃ ᕿᖕᒥᖃᕐᑎᓗᒋᑦ, ᐃᓚᖏᑦ ᓯᑕᒪᐅᔪᖏᒐᕐᑐᓂᒃ ᕿᖕᒥᖃᕐᑎᓗᒋᑦ. ᐊᖑᑏᑦ ᐊᖑᓇᓱᑦᓯᑎᐅᑐᐊᕋᒥᒃ, ᐊᒥᓱᓂᒃ ᕿᖕᒥᓂᒃ ᓂᕆᒃᑫᒍᓐᓇᕋᒥᒃ ᐊᒥᓱᓂᒃ ᕿᖕᒥᖃᕐᐸᓚᐅᕐᑐᑦ.

ᐅᓪᓗᒥᐅᔪᖅ, ᐊᕐᓱᕈᓐᓇᖏᓐᓂᓴᒻᒪᕆᐅᓕᕐᑐᖅ ᓯᑭᑑᖃᓕᕐᒪᑦ. ᐃᓚᖓᒍᑦ ᐱᐅᓂᕐᓴᐅᒐᓗᐊᕐᓱᓂ ᑭᓯᐊᓂ, ᐅᓪᓗᒥ ᕿᖕᒦᑦ ᑕᒫᓂᕐᕿᑐᐃᓐᓇᐸᓕᕐᑐᑦ: ᑳᓴᓖᖃᕐᑎᓇᒍᓗ ᐊᒻᒪᓗ ᐊᐅᓚᑎᓂᒃ ᓯᖁᒥᓯᒪᔪᕐᓂᐊᑎᖃᕋᓂᓗ ᐃᓱᐃᑦᑑᕙᑦᑐᖅ. ᐅᓪᓗᒥ, ᐊᑭᑐᔪᒻᒪᕆᐅᓕᕐᒪᑕ ᓱᓇᓕᒫᑦ. ᐃᓅᓯᕗᑦ ᐊᕐᓱᕈᓐᓇᑐᐊᓗᖏᓐᓇᑐᖅ ᑭᓯᐊᓂ ᐱᑦᔪᑏᑦ ᐊᑦᔨᐅᖏᓐᓂᓴᐅᓕᕐᑎᓗᒋᑦ ᐊᕐᓱᕈᓐᓇᑐᐃᑦ.

ᐅᓪᓗᒥᐅᔪᖅ, ᕿᖕᒥᖃᓕᕐᑐᒍᑦ ᓇᓂᓕᒫᑦᓯᐊᑐᓂᒃ ᓄᓇᓕᑦᑎᓂ, ᑭᓯᐊᓂ ᑖᒃᑯᐊ ᕿᖕᒦᑦ ᖃᐅᔨᒣᑦᑐᐃᑦ. ᑌᑦᓱᒪᓂᓕ, ᐱᕐᓯᑐᒻᒪᕆᐊᓗᒐᓗᐊᕐᒪᑦ ᐊᓂᕐᕋᒧᑦ ᑐᕂᓐᓇᑐᐃᓐᓇᐸᓚᐅᕐᑎᓗᒋᑦ. ᐊᖑᑏᓪᓘᓃᑦ ᓴᖑᐊᑎᑦᓯᒐᓱᐊᕆᐊᖃᑦᔭᑎᓐᓇᒋᑦ ᕿᖕᒥᒥᓂᒃ. ᖃᐅᔨᒪᑦᓯᐊᑐᐃᓐᓇᒪᑕ ᓇᒧᙵᕆᐊᖃᕐᒪᖔᕐᒥᒃ. ᕿᖕᒦᑦ ᑌᑦᓱᒪᓂ ᖃᐅᔨᒻᒪᓂᐊᒻᒪᕆᐅᕙᓚᐅᕐᑐᑦ. ᐃᓅᑦᓱᑕ ᕿᒧᑦᓯᖃᕈᓯᒋᕙᓚᐅᕐᑕᑎᓐᓂᒃ ᐊᓯᐅᔨᔭᐅᒋᐊᖃᕐᑐᕆᑦᓯᖏᓪᓚᒍᑦ ᕿᖕᒥᖃᕈᓯᒋᕙᓚᐅᕐᑕᕗᑦ ᐱᒻᒪᕆᐊᓘᒻᒪᑕ.

ᐃᓄᒃᑎᑐᑦ ᐅᖃᐅᓯᕗᑦ, ᐱᒻᒪᕆᐊᓗᖁᑎᒋᒻᒥᔭᕗᑦ ᐊᒻᒪᓗ ᐃᓄᑐᖃᐅᑦᓱᑕ ᖃᐅᔨᒪᓂᕐᐸᐅᓱᑕ ᐅᖃᐅᓯᑦᑎᓂᒃ. ᐅᕕᒃᑫᑦ ᐅᓪᓗᒥᐅᓕᕐᑐᖅ ᐃᓄᒃᑎᑑᕈᓯᖏᑦ ᑌᑦᓱᒪᓂᐅᕙᓚᐅᕐᒪᑦ ᐊᑦᔨᒋᑦᔭᒍᓐᓀᑕᖓ. ᐃᓄᒃᑎᑐᓪᓚᕆᒃ ᐅᖄᒍᓐᓇᓯᐊᖏᓐᓈᑕᒪ ᐃᓅᓱᑦᑐᐃᑦ, ᐊᒻᒪᓗ ᑕᒪᓐᓇ ᐱᒻᒪᕆᐅᑦᓱᓂ ᐅᕙᑦᑎᓄᑦ. ᐅᕕᒃᑫᑦ ᐅᓪᓗᒥᐅᓕᕐᑐᖅ ᐅᖃᐅᓯᖏᓐᓂᒃ ᑐᑭᓯᒪᑦᔭᒍᓐᓀᕋᓗᐊᕐᓱᑕ, ᐊᑦᔨᐅᖏᓐᓂᓴᐅᓕᕐᒪᑕ ᑭᖑᕚᕗᑦ. ᐃᓄᒃᑎᑐᑦ ᐅᖄᒐᓗᐊᕐᓱᑕ ᑭᓯᐊᓂ ᐊᑦᔨᒋᙱᑕᖏᓐᓂᒃ ᑌᑦᓱᒪᓂᐅᕙᓚᐅᕐᒪᑦ ᑐᑭᖃᕈᓐᓀᒪᑕ. ᑌᒣᒻᒪᑦ ᐃᓄᒃᑎᑐᑦ ᐅᖃᐅᓯᑦᑎᓂᒃ ᐅᕕᒃᑫᑦ ᐃᓕᓐᓂᐊᕆᐊᖃᕐᓂᖏᑦ ᐱᒻᒪᕆᐊᓘᕗᖅ.

ᐱᒻᒪᕆᐊᓘᒻᒥᓱᓂᓗ ᐅᕕᒃᑫᑦ ᓈᓚᒋᖃᕐᓂᖏᑦ ᐃᓄᑐᖃᕐᓂᑦ ᖃᐅᔨᒪᒋᐊᖃᕐᒪᑕ ᖃᓄᖅ ᐃᓅᒐᓱᐊᕐᐸᓚᐅᕐᒪᖔᑦᑕ, ᐊᒻᒪᓗ ᐱᐅᓯᑐᖃᕐᑎᓂᒃ ᐊᓯᐅᔨᑦᑌᓕᒋᐊᖃᕐᓱᑎᒃ. ᐱᐅᓯᑐᖃᕐᑎᓂᒃ ᐊᓯᐅᔨᕙᓪᓕᐊᒐᑦᑕ ᑭᖑᕚᕇᒋᐊᑕᒫᑦ. ᐱᒍᓐᓇᕕᓕᒫᑦᑎᒍᑦ ᐅᖄᕕᒋᒐᓱᐊᕐᐸᑕᕗᑦ ᐅᓂᒃᑳᑎᒍᑦ ᐊᒻᒪᓗ ᐃᓅᑦᓯᐊᕋᓱᐊᕆᐊᖃᕐᓂᖏᓐᓂᒃ ᐅᖃᐅᑦᔪᓱᒋᑦ. ᐃᓚᖏᑦ ᐃᕐᖃᐅᒪᒐᒥᒃ ᑌᒣᒋᐊᖃᕆᐊᒥᒃ ᒪᓕᒐᓱᐊᕐᐸᑑᒐᓗᐊᑦ ᑕᒪᒃᑯᓂᖓ ᐱᐅᓯᑐᖃᑦᑎᓂᒃ.

ᓕᓯ ᐃᕐᓂᖅ
ᐱᕈᕐᐸᓕᐊᓂᑦᑎᓂᓪᓕ, ᐅᓪᓗᒥᐅᓕᕐᑐᖅ ᐃᓱᕐᕉᑎᐅᕙᓕᕐᑐᓂᒃ ᐱᑕᖃᓚᐅᕐᓯᒪᙱᒪᑦ ᐊᕐᓱᕈᓐᓇᑐᒃᑰᖃᑦᑕᓯᒪᑦᓱᑕᓗ, ᐃᓅᒐᓱᐊᕈᓐᓇᕕᓕᒫᑎᒍᑦ ᐃᓅᒐᓱᐊᕐᓱᑕ ᑳᓐᓇᑐᐊᓘᑎᓪᓗᒍ. ᐅᓪᓗᒥ, ᐅᕕᒃᑫᑦ ᐊᒥᓱᐊᓗᐃᑦ ᖃᐅᔨᒪᑦᔭᒍᓐᓀᑐᑦ ᐊᕐᓱᕈᓐᓇᑐᑰᓂᕆᓯᒪᔭᑦᑎᓂᒃ, ᐃᓱᑦᕉᑏᑦ ᓄᑖᑦ ᐊᒥᓱᐊᓗᓐᓄᑦ ᐃᓱᕐᕉᑎᐅᓕᕐᒪᑕ ᐊᕐᓱᕈᓐᓇᔭᒐᑎᒃ, ᑌᒣᒻᒪᑦ ᐅᕕᒃᑫᑦ ᐊᒥᓱᐊᓗᐃᑦ ᑳᓐᓇᑐᒃᑰᑦ ᐃᓅᒐᓱᐊᕋᔭᕈᑎᒃ ᐅᕙᒍᑦᑎᑐᑦ ᖃᓄᖅ ᐃᓅᒐᓱᐊᕋᔭᕆᐊᒥᒃ ᖃᐅᔨᒪᑦᔭᒍᓐᓀᑐᑦ.

ᑌᑦᓱᒪᓂ, ᑮᓇᐅᔭᖃᓚᐅᕐᑎᓇᒍ ᓱᓕ ᐅᑭᐅᕐᑕᑐᒥ, ᑎᕆᒐᓐᓂᐊᔭᒧᑦ ᐊᑕᐅᓯᕐᒧᑦ, ᐊᑕᐅᓯᕐᒥᒃ ᑕᐅᕐᓯᐅᑎᒋᑦᓱᒍ ᓂᐅᕕᕐᐸᓚᐅᕐᑐᑦ. ᑮᓇᐅᔭᑐᐃᓐᓇᓂᒃ ᐊᕕᑦᓯᒪᔪᓂᓘᓐᓃᑦ ᑕᑯᓚᐅᕐᓯᒪᒐᑕ. ᓂᐅᕕᕈᓐᓇᐅᑎᑖᑐᐃᓐᓇᓱᑕ ᐊᒻᒪᓗ ᓂᐅᕕᕋᓱᐊᕐᐸᓱᑕ ᑮᓇᐅᔭᐅᙱᑐᓄᑦ. ᑮᓇᐅᔦᑦ ᐱᐅᑦᔭᖏᓪᓚᑦ. ᐊᒥᓱᐊᓗᐃᑦ ᐅᕕᒃᑫᑦ ᐅᓪᓗᒥᐅᓕᕐᑐᖅ ᑮᓇᐅᔭᖃᑐᐊᕈᑎᒃ ᑭᓯᐊᓂ ᐃᓅᒐᓱᐊᕈᓐᓇᑐᕆᓕᕐᑐᑦ.

ᒥᐊᔨ ᑭᐊᑌᓐᓇ, ᐃᓄᓗᒃ ᕿᓰᖅ, ᒫᑕ ᑐᓂᖅ, ᓕᓯ ᑐᓂᖅ
ᐅᓪᓗᒥ, ᒥᕐᓱᒋᐅᕐᓴᑎᑦᓯᕙᑦᑐᒍᑦ ᐊᓐᓄᕌᓕᐅᒍᓯᒋᕙᓚᐅᕐᑕᑎᓐᓂᒃ ᐃᓕᓐᓂᐊᑎᑦᓯᓱᑕ. ᐃᕐᖑᑕᑦᑎᓂᒃ ᕿᑐᕐᖓᑎᓂᓘᓐᓃᑦ ᒥᕐᓱᕆᐅᕐᓴᑎᑦᓯᓱᑕ.

ᓂᕿᑐᐃᓐᓀᑦ ᐅᕙᑦᑎᓄᑦ ᐱᒻᒪᕆᐊᓘᕗᑦ. ᐱᒻᒪᕆᐊᓘᕙᓚᐅᕋᒥᒃ ᐱᕈᕐᓴᑎᓪᓗᑕ. ᓂᕿᑦ ᑭᓯᒥ ᐃᓱᒪᓇᕐᐸᓚᐅᕐᒪᑕ. ᐅᓪᓗᒥᐅᓕᕐᑐᓕ ᐱᐅᓂᕐᐹᓂᒃ ᑭᓯᐊᓂ ᐱᒐᓱᐊᕐᑑᔮᓱᖑᓕᕋᑦᑕ, ᑭᓯᐊᓂ ᐃᓚᖓᓂ ᓂᐅᕕᕐᓂᐊᕕᖕᒥ ᑭᓯᐊᓂ ᓂᐅᕕᐊᕕᓂᕐᓂᒃ ᓂᕿᑖᕋᓱᐊᓲᖑᓕᕐᑐᒍᑦ.

ᐅᓪᓗᒥ, ᐅᕐᖂᔪᓂ ᐃᒡᓗᔪᐊᖃᓕᕐᓱᑕ, ᐃᑯᒪᐅᑎᓄᑦ ᐃᑯᒪᒍᓐᓇᑐᓂᒃ ᐃᒪᖃᐅᑎᓕᓐᓂᓗ ᐃᒪᖃᕈᓐᓇᓲᒍᓕᕐᑐᓂᒃ. ᑕᒪᓐᓇ ᖃᓄᐃᙱᑐᖅ. ᑭᓯᐊᓂ ᓂᕿᑐᐃᓐᓇᓂᒃ ᓂᕆᒍᒪᓂᕐᓴᐅᖏᓐᓇᑐᒍᑦ; ᐳᐃᔨᕕᓂᕐᓂᒃ ᐱᓗᐊᕐᑐᖅ, ᒪᒪᕐᓴᓂᕐᐸᐅᔪᒍᑦ. ᐱᐊᕋᐅᕙᓚᐅᕋᑦᑕ ᑌᒪᙵᓂᑦ, ᐳᐃᔨᕕᓂᕐᓂᒃ ᐃᖃᓗᓐᓂᒃ, ᐃᖃᓗᑉᐱᓂᒃ ᓂᕆᖃᑦᑕᓯᒪᒐᑦᑕ. ᓂᕿᑐᐃᓐᓇᓂᒃ ᓂᐅᕕᕐᕕᒥᓂᑕᕐᓂᓘᓐᓃᑦ ᓂᕿᓂᒃ ᓇᓪᓕᑳᕐᑎᑕᐅᒍᑦᑕ ᓂᕿᑐᐃᓐᓇᓂᒃ ᓇᓪᓕᑳᕐᓂᓴᐅᒐᔭᖏᓐᓇᑐᒍᑦ. ᐊᖑᑏᑦ ᓄᓇᓕᑦᑎᓂ ᓂᕿᑐᐃᓐᓇᖃᑦᑎᓯᕙᒻᒪᑕ, ᑭᓯᐊᓂ ᓂᐅᕕᕐᕕᒥᑦ ᓂᕿᓂᒃ ᓂᐅᕕᕆᐊᖃᕐᐸᑐᒍᑦ ᐃᓚᖓᓂ.

ᓄᓇᑦᑎᓂᓗ ᐱᕈᕐᑐᓂᒃ ᖃᓄᐃᑦᑐᑐᐃᓐᓇᓂᒃ ᐱᒍᓐᓇᓲᖑᒻᒥᓱᑕ. ᐅᑦᑑᑎᒋᓗᒋᑦ ᐁᕋᕐᓂᒃ, ᐃᒻᒧᓕᓐᓂᒃ ᒪᒪᕐᑑᓱᑎᒃ ᐱᑕᑦᓴᔭᒥᓂᒃ ᐱᑕᑦᓴᓕᓐᓂᒃ. ᖁᕐᓱᑕᓂᒃ ᐱᕈᕐᓯᐊᑦ ᐱᕈᕐᑐᖃᓲᖑᒻᒥᔪᖅ ᐅᕐᓱᒥᑦ ᐃᓚᑐᐃᓐᓇᓱᒋᑦ ᓂᕆᔭᐅᒍᓐᓇᑐᓂᒃ. ᐊᓐᓂᐊᓯᐅᑎᖃᓲᖑᒻᒥᔪᒍᑦ, ᑏᕐᓗᓂᒃ ᓄᕙᓐᓂᐅᑎᒋᑦᓱᒋᑦ. ᑭᒻᒥᓇᕐᑐᓲᖑᒻᒥᔪᒍᑦ, ᓰᕐᓇᑐᐸᐅᔮᓗᑦᓱᑎᒃ ᐊᐅᐸᕐᑑᓱᑎᒃ ᐸᐅᕐᖓᓂᒃ ᐃᒡᒋᐊᓕᕆᓕᕋᑦᑕ ᖃᓂᕐᓗᓕᕋᑦᑕᓘᓐᓃᑦ.

Back to Top