Skip to Main Contents

ᓄᓇᙳᐊᑦ | ᐃᓕᑕᕆᔭᐅᓂᕐᑖᑐᑦ | ᖃᐅᔨᒋᐊᕐᕕᒋᑎᒍᑦ | Français | English

Houses on the outskirts of a village, with a hill covered with snow and some trees in the background, at sunset.

ᐃᓄᑦᑕᖏᑦ

ᑰᒃᔪᐊᖅ

ᓄᓇᕕᒃ

Map of Nunavik

ᓄᓇᕕᒃ

ᓄᓇᕕᒃ ᓄᓇᓕᐊᑦᑕᖃᕐᐳᖅ 14-ᓂᒃ ᐃᕐᐸᖓᑦᓱᑎᒃ ᓄᓇᐅᑉ ᓯᓈᓂᑦᑐᓂᒃ ᓯᕕᑐᓂᖏᑦ ᓯᓈᒍᑦ 500,000 ᑭᓛᒥᑕᓂᒃ ᐊᖏᓂᖃᕐᑐᒥ. ᑖᓐᓇᑕᒐ ᓄᓇᙳᐊᖅ ᑐᑭᓯᓇᕐᑎᓯᒍᑎᒥᒃ ᓄᐃᑕᑎᑦᓯᔪᖅ ᐊᑑᑎᔭᐅᓯᒪᔪᓂᒃ, ᐃᓄᒋᐊᑦᑑᓂᖏᓐᓂᓗ ᐊᒻᒪᓗ ᓱᓇᓕᒫᑎᒍᑦ ᖃᓄᐃᑦᑑᓂᖏᓐᓂᒃ ᑕᒪᒃᑯᐊ ᓄᓇᓖᑦ.


Map of Kangiqsualujjuaq

ᑲᖏᕐᓱᔪᐊᓗᒃᔪᐊᖅ
ᑲᖏᕐᓲᓱᓂ ᐊᖏᔪᐸᐅᔮᓗᒃ

58°42′41″N
065°59′37″W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 66 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ.
ᓄᓇᓕᐅᑉ ᐊᖏᓂᖓ: 629.8 km2
ᓄᓇᙳᐊᒥ ᓇᓃᓐᓂᖓ: 25 ᑭᓛᒥᑕᓄ ᐅᖓᕙᒧᑦ ᐅᖓᓯᓐᓂᖃᕐᑐᖅ, ᑲᖏᕐᓱᐊᓗᒃᔪᐊᑉ ᑰᖓᑕ ᐹᖓᓂᑦᓱᓂ.

ᐃᓄᒋᐊᑦᑑᓂᖓ: 944
ᐊᒥᓱᙳᐸᓪᓕᐊᓂᖏᑦ: 7,0%
ᐃᓄᑐᐃᓐᓀᑦ ᐅᓄᕐᓂᖏᑦ: 93,6%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᐊᑭᓚᓴᑲᓪᓗᖅ, ᑲᖏᕐᓱᐊᓗᒃᔪᐊᑉ ᑰᖓᓂ ᑲᖏᕐᓱᐃᑦ ᐊᒥᓱᒻᒪᑕ ᑲᖏᕐᓲᖃᑕᐅᑦᓱᓂ.

ᐊᑑᑎᔭᐅᓯᒪᔪᑦ: ᐱᖓᓱᕕᑦᓱᑎᒃ ᑲᒻᐸᓂᒃᑯᑦ ᓂᐅᕕᕐᓂᐊᕕᒻᒥᒃ ᐅᒃᑯᐃᓯᖃᑦᑕᓯᒪᔪᑦ ᐊᕐᕌᒍᐃᑦ 1838 ᐊᒻᒪᓗ 1932 ᐊᑯᓐᓂᖏᓐᓂ ᒫᓐᓇ ᓄᓇᓕᖓᑕ ᓯᕿᓂᐊᓂ. 1959-ᒍᓕᕐᑎᓗᒍ ᐃᓄᐃᑦ ᑖᕙᓂᒥᐅᑦ ᓄᓇᕕᒻᒥ ᓯᕗᓪᓕᐹᑦᓯᐊᒥᒃ ᑯᐊᐸᒥᒃ ᐅᒃᑯᐃᓯᓚᐅᕐᑐᕕᓃᑦ, ᐃᖃᓗᑉᐱᓂᒃ ᓂᐅᕐᕈᓭᑦᓱᑎᒃ. 1962-ᒥ, ᓄᓇᓕᙳᐸᓪᓕᐊᓯᔪᕕᓂᖅ ᐊᒻᒪᓗ ᑭᖑᓂᖓᒍᑦ ᐊᕐᕌᒎᓕᕐᒥᔪᓂ, ᑲᕙᒪᒃᑯᑦ ᐃᓪᓗᔪᐊᓂᒃ ᓴᓇᕙᓪᓕᐊᓯᒪᔪᑦ, ᐃᓕᓐᓂᐊᕕᓕᐅᕐᓱᑎᒃ ᐊᒻᒪᓗ ᑯᐊᐸᒥᒃ ᓂᐅᕕᕐᓂᐊᕕᑦᑖᓱᑎᒃ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1980-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: George River, Port-Nouveau-Québec


Map of Kuujjuaq

ᑰᒃᔪᐊᖅ
ᑰᒻᒪᕆ

58°05'46"N
068°25'37"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 39 ᒦᑕᓄᑦ ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐱᕈᕐᓯᐊᓄᑦ ᐊᑦᔨᒐᓚᖏᓐᓄᓗ.
ᓄᓇᓕᐅᑉ ᐊᖏᓂᖓ: 630.7 km2
ᓄᓇᙳᐊᒥ ᓇᓃᓐᓂᖓ: 50 ᑭᓛᒥᑕᓄ ᐅᖓᕙᒧᑦ ᐅᖓᓯᓐᓂᖃᕐᓱᓂ, ᑰᒃᔪᐊᖅ ᑰᑉ ᓂᒡᒋᐊᓂᑦᑐᖅ.

ᐃᓄᒋᐊᑦᑑᓂᖓ: 2644
ᐊᒥᓱᙳᐸᓪᓕᐊᓂᖏᑦ: 10,0%
ᐃᓄᑐᐃᓐᓀᑦ ᐅᓄᕐᓂᖏᑦ: 76,0%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᑰᒃᔪᐊᑉ ᑰᖓ.

ᐊᑑᑎᔭᐅᓯᒪᔪᑦ: 1811-ᒥ, ᒧᔦᕕᐊᙳᑦᓱᑎᒃ ᐊᔪᕿᕐᑐᐃᔩᑦ ᑖᕙᓂ ᐃᓄᓐᓂᒃ ᓵᒋᐊᕐᑎᓯᒋᐊᕐᑐᓱᑎᒃ ᑖᕗᙵᓚᐅᕐᑐᕕᓃᑦ. ᑭᖑᓂᖓᒍᑦ 1830-ᒥ, ᑲᒻᐸᓂᒃᑯᑦ ᓂᐅᕕᕐᓂᐊᕕᒻᒥᒃ ᓄᐃᑦᓯᓕᕐᓂᒥᔪᑦ ᒫᓐᓇ ᑰᒃᔪᐊᑉ ᓄᓇᓕᒋᓕᕐᑕᖓᑕ ᐅᖓᓯᑦᑕᕆᙱᑕᖓᓂ. ᓂᐅᕕᕐᓂᐊᕕᒃ ᑕᐅᕐᓰᖃᑦᑕᐅᑎᐅᕙᓕᕐᑐᕕᓂᖅ, ᐃᓄᐃᑦ, ᐊᒡᓓᓗ ᒨᑖᓀᑦ, ᓇᔅᑳᐱᓪᓗ ᒥᕐᖁᓕᓐᓂᒃ ᑕᐅᕐᓰᖃᑎᖃᕐᓱᑎᒃ ᓂᐅᕕᕐᐸᑎᓪᓗᒋᑦ.

1942-ᒥ, ᐊᒥᐊᔨᑲᒥᐅᑦ ᐅᓇᑕᕐᓯᓴᔭᖏᑦ ᑖᕙᓂ ᓇᔫᑎᓚᐅᕐᑐᕕᓃᑦ, ᓴᒃᑯᑕᐅᒐᒥᒃ ᐊᒥᐊᔨᑲᓄᑦ ᑲᓇᑕᐅᑉ ᑲᕙᒪᒃᑯᖏᓐᓅᑕᐅᓚᐅᕐᑐᕕᓂᖅ ᓄᓇᕐᔪᐊᒥ ᐅᓇᑕᕐᓂᔪᐊᑦ ᑐᖓᓕᐊᓂ ᐅᓇᑕᕐᓂᔪᐊᖅ ᓄᕐᖃᑐᐊᕐᒪᑦ. ᐃᑦᓯᔭᕐᔪᐊᑦ ᐊᔪᕿᕐᑐᐃᔨᖏᑦ ᑐᙵᕕᑦᑖᓕᕐᓂᒥᔪᑦ ᑖᕙᓂ 1948-ᒥ, ᐋᓐᓂᐊᕖᑦ ᑭᖑᓂᖓᒍᑦ ᓇᑉᐸᑕᐅᓕᕐᓂᒥᔪᑦ, ᐃᓕᓐᓂᐊᕕᓪᓗ ᐊᒻᒪᓗ ᓯᓚᓐᓂᐊᕕᒃ. 1961-ᒥ, ᑯᐊᐸᒃ ᐱᒋᐊᕐᑎᑕᕕᓂᐅᑎᓪᓗᒍ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1979-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Fort Chimo


Map of Tasiujaq

ᑕᓯᐅᔭᖅ
ᑕᓯᕐᕿᑐᐃᓐᓇᖅ

58°40'04"N
069°57'21"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 37 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 633.9 km2
ᓄᓇᙳᐊᒥ ᓇᓃᓐᓂᖓ: ᑕᓯᐅᔭᖓᑕ ᓯᑦᔭᖓᓂ ᑕᒡᒐᓂ ᑲᖏᐊᓂ ᕈᕿᕿᔨ )ᖑᑭᑕᓕᒥᑭ -ᒥ

ᐃᓄᒋᐊᑦᑑᓂᖓ: 354
ᐊᒥᓱᙳᐸᓪᓕᐊᓂᖏᑦ: 16,1%
ᐃᓄᑐᐃᓐᓀᑦ ᐅᓄᕐᓂᖏᑦ: 93,4%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᑕᕆᐅᑉ ᐹᖓᓂᑦᓱᓂ ᑕᓯᕐᕿᑐᐃᓐᓇᐅᒪᑦ ᑕᓯᐅᔭᐅᓂᕋᕐᑕᐅᓚᕿᔪᖅ.

ᐊᑑᑎᔭᐅᓯᒪᔪᑦ: ᓂᐅᕕᕐᓂᐊᕕᒃ ᐅᒃᑯᐃᑕᐅᓚᐅᕐᑐᓂᖅ ᐅᐃᒍᐃᑦ ᓂᐅᕕᕐᓂᐊᕕᖓ ᐊᒻᒪᓗ ᑲᒻᐸᓂᒃᑯᑦ ᓂᐅᕕᕐᓂᐊᕕᖓ 1905-ᒥ ᐊᒻᒪᓗ 1907-ᒥ, ᑭᖑᓕᕆᑦᓱᑎᒃ. 1963-ᒥ, ᑯᐯᑉ ᓄᓇᖁᑎᖓ ᓄᐃᑕᐅᓕᓚᐅᕐᓂᒥᔪᖅ ᓄᑖᖅ ᓄᓇᓕᐊᕈᕐᒥᒃ ᓄᐃᑦᓯᓱᓂ ᐃᓄᓐᓄᑦ ᐱᐅᒋᔭᐅᔪᒻᒪᕆᐅᔪᒥᒃ, ᐆᒪᔪᖃᑦᓯᐊᑐᒻᒪᕆᐅᒻᒪᑦ. 1971-ᒥ ᑕᓯᐅᔭᖅ ᓇᒻᒥᓂᖅ ᑯᐊᐸᒥᒃ ᓇᑉᐯᓕᕐᓂᒥᔪᖅ, ᐅᓪᓗᒥᐅᓕᕐᑐᖅ ᐃᓚᒌᓴᕐᒧᑦ ᐃᓚᐅᓕᕐᑐᒥᒃ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1980-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Leaf Bay, Baie-aux-Feuilles


Map of Aupaluk

ᐊᐅᐸᓗᒃ
ᓄᓇᖓ ᐊᐅᐸᓗᑦᑕᖅ

59°17'48"N
069°35'59"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 36 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 630.4 km2
ᓄᓇᙳᐊᒥ ᓇᓃᓐᓂᖓ: Hopes Advance Bay ᓯᑦᔭᖓᓂᑦᑐᖅ

ᐃᓄᒋᐊᑦᑑᓂᖓ: 215
ᐊᒥᓱᙳᐸᓪᓕᐊᓂᖏᑦ: 8,6%
ᐃᓄᑐᐃᓐᓀᑦ ᐅᓄᕐᓂᖏᑦ: 89,7%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᓯᕐᒥᖓ ᐊᐅᐸᓗᑦᑕᐅᒪᑦ ᐊᐅᐸᓘᓚᕿᔪᖅ, ᓴᕕᕋᔭᑦᓴᔭᑦᓯᐊᐸᐅᔭᐅᑦᓱᓂ.

ᐊᑑᑎᔭᐅᓯᒪᔪᑦ: ᑖᕙᓐᓇ ᖃᐅᔨᒪᔭᐅᒍᑎᖃᓪᓚᕆᑦᑐᖅ ᐃᒪᕐᒥᐅᑕᓂᒃ ᓄᓇᒥᐅᑕᓂᓗ ᐆᒪᔪᖃᑦᓯᐊᑐᐊᓘᒋᐊᖓ. ᐃᓄᐃᑦ ᐊᓯᖏᓐᓂ ᓄᓇᓖᑦ ᓄᓇᕕᒻᒥ ᓄᓇᓕᙳᐸᓪᓕᐊᓕᕐᒪᑕ ᓄᓇᓕᐊᕈᙳᓚᕆᓯᒪᔪᑦ 1975-ᒥ, ᑲᓇᑕᐅᑉ ᐅᑭᐅᕐᑕᑐᖓᓂ ᓯᕗᓪᓕᐹᑦᓯᐊᖑᑦᓱᓂ ᓄᓇᓕᐊᕈᙳᓯᒪᔪᖅ ᐃᓄᑐᐃᓐᓇᖏᓐᓇᓯᐊᓄᑦ ᓄᓇᓕᙳᑎᑕᐅᑦᓱᓂ. ᑯᐊᐸᓗ ᓂᐅᕕᕐᓂᐊᕕᒃ ᐅᒃᑯᐃᓱᓂ 1980 ᐊᕐᕌᒍᖏᑦ ᐱᒋᐊᕐᖃᒥᐅᑎᓪᓗᒋᑦ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1981-ᒥ


Map of Kangirsuk

ᑲᖏᕐᓱᒃ
ᑲᖏᕐᓱᖅ

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 123 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 629.6 km2
ᓄᓇᙳᐊᒥ ᓇᓃᓐᓂᖓ: ᑲᖏᕐᓲᑉ ᑰᖓ ᕿᙳᐊᓂᑦᑐᖅ

ᐃᓄᒋᐊᑦᑑᓂᖓ: 608
ᐊᒥᓱᙳᐸᓪᓕᐊᓂᖏᑦ: 9,7%
ᐃᓄᑐᐃᓐᓀᑦ ᐅᓄᕐᓂᖏᑦ: 92,7%

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Payne Bay.

ᐊᑑᑎᔭᐅᓯᒪᔪᑦ: 1920 ᐊᕐᕌᒍᖏᓐᓂ, ᐅᐃᒍᐃᒃᑯᑦ ᑲᒻᐸᓂᒃᑯᓗ ᓂᐅᕕᕐᓂᐊᕕᖏᑦ ᓇᑉᐸᑕᐅᓚᐅᕐᑐᕕᓃᑦ ᑖᕙᑦᓱᒪᐅᑉ ᓄᓇᖓᓂ. 1959-ᒥ, ᑲᕙᒪᑐᖃᒃᑯᑦ ᐃᓕᓐᓂᐊᕕᖁᑎᖓ ᐅᒃᑯᐃᑕᐅᓚᐅᕐᑐᕕᓂᖅ; ᐊᕐᕌᒍᐃᑦ ᐊᒥᓲᙱᑐᑦ ᓈᒻᒪᑕ, 1961-ᒥ, ᐃᓅᓯᓕᕆᔩᑦ, ᐃᓗᓯᓕᕆᔩᑦ ᐊᒻᒪᓗ ᐃᓪᓗᓕᕆᔩᑦ ᑎᑭᓕᕐᓂᒥᔪᑦ. ᐊᖕᓕᑲᒃᑯᑦ ᐊᔪᕿᕐᑐᐃᔨᖏᑦ ᑐᙵᕕᑦᑖᓕᕐᓂᒥᔪᑦ 1965-ᒥ ᐊᒻᒪᓗ ᑯᐊᐸᖓ ᐅᒃᑯᐃᓱᓂ 1966-ᒥ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1981-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Payne Bay, Bellin


Map of Quaqtaq

ᖁᐊᕐᑕᖅ
ᖁᐱᕐᕈᒃ ᖁᐊᕐᑕᖅ

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 31 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 582.4 km2
ᓄᓇᙳᐊᒥ ᓇᓃᓐᓂᖓ: ᑐᕚᓗᒃ ᑐᑭᓕᒃ "ᑕᕆᐅᖅ ᐊᖏᔪᐊᓗᑦᓱᓂ ᓯᑯᓯᒪᔪᖅ" ᐅᖓᕙᐅᑉ ᓄᕘᓪᓗ ᑲᑎᒋᐊᕐᓂᖓᓂᑦᓱᓂ.

ᐃᓄᒋᐊᑦᑑᓂᖓ: 426
ᐊᒥᓱᙳᐸᓪᓕᐊᓂᖏᑦ: 12,4%
ᐃᓄᑐᐃᓐᓀᑦ ᐅᓄᕐᓂᖏᑦ: 90,7%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᓄᓇᓕᒻᒥᐅᑦ ᐅᓂᒃᑳᑐᐊᖓᑎᒍᑦ, ᕿᓚᓗᒐᕐᓯᐅᒋᐊᕐᓱᓂ ᑖᕘᓇ ᐊᕐᖁᓵᕐᓱᓂ ᖁᐱᕐᕆᓯᒪᓚᐅᕐᑐᕕᓂᐅᒻᒪᑦ ᐊᖑᑎᒃ ᕿᓚᓗᒐᕐᓯᐅᒋᐊᖃᑕᐅᔪᖅ, ᖁᐱᕐᕆᓇᕐᑐᒥᒃ ᒥᑭᒐᕐᒥᒃ ᓂᕆᔪᕕᓂᐅᒍᓇᐅᑦᓱᓂ. ᑌᒣᓐᓂᒪ, ᐊᖑᑎᐅᖃᖏᑦ ᑖᕚᑦᓱᒥᖓ ᖁᐊᕐᑕᒥᑦ ᐊᑦᓯᕋᕐᑕᐅᒍᑎᑖᕐᑎᓯᔪᕕᓃᑦ.

ᐊᑑᑎᔭᐅᓯᒪᔪᑦ: ᑐᓂᕐᑕᓂᐊᕐᑏᑦ ᖃᐅᔨᓴᐅᑎᒋᓯᒪᔭᖏᑦ ᖃᐅᔨᒪᓇᕐᑎᓯᔪᑦ ᐃᓄᐃᑦ }ᑖᕙᓂ ᓄᓇᓯᒪᓯᓚᐅᕐᕕᓂᐅᒋᐊᖏᑦ ᐊᕐᕌᒍᐃᑦ 3,500 ᓈᓕᕐᑐᑦ. ᑐᓂᕐᑕᓂᒃ ᑕᑯᑦᓴᐅᔪᖃᕐᒥᔪᖅ ᐃᓄᑐᐃᓐᓇᖄᕕᓃᑦ ᑖᕙᓂᒥᐅᒍᓯᒪᒋᐊᖏᓐᓂᒃ ᐊᕐᕌᒍᐃᑦ 500-600 ᓈᓯᒪᓕᕐᑐᑦ ᐅᓪᓗᒥᒧᑦ ᑖᕙᓂᓚᐅᕐᑐᕕᓂᐅᑎᓪᓗᒋᑦ. 1927 ᐱᒋᐊᕐᕕᐅᑎᓪᓗᒍ, ᐊᕐᕌᒍᐃᑦ ᐊᕙᑏᑦ ᒥᑦᓵᓃᑦᑐᓂᒃ ᖁᐊᕐᑕᖅ ᓂᐅᕕᕐᓂᐊᕕᓐᓄᑦ ᑎᑭᑕᐅᖃᑦᑕᕙᓪᓕᐊᓯᒪᔪᖅ ᐊᑦᔨᒌᙱᑐᓄᑦ ᐊᐅᓚᑕᐅᔪᓂᒃ, ᐅᐃᒍᐃᑦ ᓂᐅᕕᕐᓂᐊᕕᖏᓐᓄᑦ, ᑲᒻᐸᓂᒃᑯᓄᑦ ᐊᒻᒪᓗ ᕿᑭᕐᑖᓗᒻᒥ ᑲᒻᐸᓂᒃᑯᑦᓄ, ᐊᒻᒪᓗ ᓇᒻᒥᓂᖁᑎᒋᔭᐅᑦᓱᑎᒃ ᓂᐅᕕᕐᑎᓄᑦ. ᐃᑦᓯᔭᕐᔪᐊᑯᑦ ᖁᐊᕐᑕᒥ ᓄᐃᑕᐅᕙᓪᓕᐊᓯᒪᒻᒥᔪᑦ 1947-ᒥ. 1952-ᒥ ᐊᐅᐸᕐᓈᓗᒻᒧᑦ ᖁᐊᕐᑕᒥᐅᑦ ᐃᓄᖏᑦᑕ 105-ᖏᑦ ᐃᓅᒍᓐᓀᓚᐅᕐᓂᒥᔪᑦ. ᐊᕐᓱᕈᓐᓇᑐᐊᓗᒃᑰᕇᕐᒪᑕ ᑭᓯᐊᓂ ᑲᕙᒪᒃᑯᑦ ᐋᓐᓂᐊᓯᐅᕐᓂᖃᑦᑕᓯᔪᕕᓃᑦ ᖁᐊᕐᑕᒥᐅᓂᒃ. 1960 ᐊᕐᕌᒍᖏᓐᓂ ᐊᓐᓂᐊᓯᐅᕐᕕᒃ, ᓂᐅᕕᕐᓂᐊᕕᓪᓗ ᐊᒻᒪᓗ ᐊᓪᓚᑖᕕᒃ ᓈᓚᐅᑎᖃᐅᑎᑦᓱᓂ ᑎᑭᑉᐸᓕᐊᓯᒪᔪᑦ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1978-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: ᓄᕗᑯᑖᖅ, Notre-Dame-de-Koartac


Map of Kangiqsujuaq

ᑲᖏᕐᓱᔪᐊᖅ
ᑲᖏᕐᓱᐊᓗᒃ

61°35'19"N
071°55'46"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 153 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 606.7 km2
ᓄᓇᙳᐊᒥ ᓇᓃᓐᓂᖓ: ᑲᖏᕐᓱᔪᐊᖅ ᓄᕘᑉ ᓯᕿᓂᐊᓂᑦᓱᓂ ᖃᕙᙵᕙᓯᒥᑦᑐᖅ, 10 ᑭᓛᒥᑕᓄᑦ ᓄᕗᒻᒧᑦ ᐅᖓᓯᓐᓂᖃᕐᓱᓂ.

ᐃᓄᒋᐊᑦᑑᓂᖓ: 771
ᐊᒥᓱᙳᐸᓪᓕᐊᓂᖏᑦ: 9,7%
ᐃᓄᑐᐃᓐᓀᑦ ᐅᓄᕐᓂᖏᑦ: 92,1%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: Wakeham Bay.

ᐊᑑᑎᔭᐅᓯᒪᔪᑦ: ᐅᐃᒍᐃᑦ ᓂᐅᕕᕐᓂᐊᕕᖓ ᑖᕙᓂ ᓇᑉᐸᑕᐅᓯᒪᔪᖅ 1910-ᒥ; ᐊᓯᐊ ᐅᒃᑯᐃᒥᑎᓪᓗᒍ 1914-ᒥ ᑯᒻᐸᓂᒃᑯᑦ ᓂᐅᕕᕐᓂᐊᕕᖓᑦ, ᑎᕆᒐᓐᓂᐊᓂᓗ ᐱᕈᕐᓭᕕᒥᒃ ᐊᐅᓚᑦᓯᓱᓂ 1928 ᐊᒻᒪᓗ 1940 ᐊᕐᕌᒍᖏᓐᓂ. 1936 ᐊᕐᕌᒍᖓᓂ ᐃᑦᓯᔭᕐᔪᐊᑦ ᑖᕗᙵᓂᕐᒥᔪᑦ. 1960 ᐊᒻᒪᓗ 1961 ᐊᑯᓐᓂᖓᓂ, ᑲᖏᕐᓱᔪᐊᖅ ᐃᓕᓐᓂᐊᕕᑦᑖᓯᒪᔪᖅ ᐊᒻᒪᓗ ᐊᓐᓂᐊᕕᑦᑖᓱᓂ. ᐊᖕᓕᑲᒃᑯᑦ ᑖᕗᙵᓕᕐᓂᒥᔪᑦ 1963-ᒥ. ᑯᐊᐸᒃ ᓄᓇᓕᒻᒥ ᐅᒃᑯᐃᑎᓪᓗᒍ 1970-ᒥ
ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1980-ᒥ
ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Wakeham Bay, Sainte-Anne-de-Maricourt


Map of Salluit

ᓴᓪᓗᐃᑦ
ᓴᓪᓗᒍᓗᐃᑦ

62°10'46"N
075°40'02"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 226 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 625.7 km2
ᓄᓇᙳᐊᒥ ᓇᓃᓐᓂᖓ: ᑲᖏᕐᓱᑯᑖᒥᑦᑐᖅ, 10 ᑭᓛᒥᑕᓄᑦ ᓄᕗᒻᒧᑦ ᐅᖓᓯᓐᓂᖃᕐᓱᓂ.

ᐃᓄᒋᐊᑦᑑᓂᖓ: 1445
ᐊᒥᓱᙳᐸᓪᓕᐊᓂᖏᑦ: 6,3%
ᐃᓄᑐᐃᓐᓀᑦ ᐅᓄᕐᓂᖏᑦ: 93,4%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᐅᓂᒃᑳᑐᐊᑎᒍᑦ ᐃᓄᐃᑦ ᑖᕙᓂ ᓄᓇᒥᒃ ᐱᐅᒋᔭᖃᕐᑐᕕᓂᐅᓂᕋᕐᑕᐅᔪᑦ ᐆᒪᔪᓕᐊᓘᓂᕋᕐᑕᐅᔪᕕᓂᒻᒪᑦ ᑖᕗᙵᓯᓚᐅᕐᑐᕕᓃᑦ ᐃᓄᐃᑦ. ᑭᓯᐊᓂ ᐆᒪᔪᖃᒐᓛᓐᓂᖏᒻᒪᑦ ᐃᓄᐃᑦ ᑖᕗᙵᕋᑖᕐᓱᑎᒃ ᑳᓐᓇᑐᕐᔪᐊᒧᑦ ᓱᒃᑯᑕᐅᓚᐅᕐᑐᕕᓃᑦ.

ᐊᑑᑎᔭᐅᓯᒪᔪᑦ: ᑐᓂᕐᑕᓂᐊᕐᑎᓄᑦ ᓴᒡᒐᑕᐅᓯᒪᔪᑦ ᑕᑯᕕᐅᓯᒪᔪᐃᑦ ᑖᕙᓐᓇ ᑐᓂᕐᓄᑦ ᓄᓇᒋᔭᐅᓚᕐᓂᕕᓂᖓᓂᒃ 2,800-ᓂᑦ 1,000-ᓄᑦ ᐊᕐᕌᒍᐃᑦ ᓈᓕᕐᑐᑦ ᐅᓪᓗᒥᒧᑦ ᑖᕙᓂᓚᐅᕐᑐᕕᓂᐅᑎᓪᓗᒋᑦ. 1925 ᐊᒻᒪᓗ 1936 ᐊᑯᓐᓂᖓᓂ ᑎᑭᑕᐅᖃᑦᑕᕙᓪᓕᐊᓯᔪᕕᓂᖅ ᓂᐅᕕᕐᕕᓐᓄᑦ. ᐃᑦᓯᔭᕐᔪᐊᑦ, ᑖᕗᙵᑎᓪᓗᒋᑦ 1930-ᒥ, ᐊᕐᕌᒍᓂ ᐊᕙᑎᓂ ᑖᕙᓂ ᐱᓇᓱᐊᕐᓱᑎᒃ. ᐊᖕᓕᑲᒃᑯᑦ ᓇᑉᐸᑕᐅᑎᓪᓗᒋᑦ 1955-ᒥ. 1950 ᐊᕐᕌᒍᖏᑦ ᐃᓱᓕᒋᐊᕕᓐᓂᓴᐅᓕᕐᑎᓗᒋᑦ, ᐃᓕᓐᓂᐊᕕᒃ ᓴᓇᔭᐅᓕᕐᓂᒥᔪᖅ, ᐃᓪᓗᔪᐊᓪᓗ ᓄᑖᑦ ᓇᑉᐸᑕᐅᕙᓪᓕᐊᓯᑦᓱᑎᒃ. 1960 ᐊᕐᕌᒍᖏᑦ ᐃᓱᓕᒋᐊᕕᓐᓂᓴᐅᓕᕐᑎᓗᒋᑦ ᑯᐊᐸᒃ ᐅᒃᑯᐃᑕᐅᑎᓪᓗᒍ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1979-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Sugluk


Map of Ivujivik

ᐃᕗᔨᕕᒃ
ᓯᑯᐃᑦ ᐃᙱᕐᕋᓂᐊᓗᓐᓄᑦ ᐃᕗᓲᑦ

62°25'02"N
077°53'31"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 38 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 524.9 km2
ᓄᓇᙳᐊᒥ ᓇᓃᓐᓂᖓ: ᓄᓇᕕᒻᒥ ᑕᕐᕋᒦᕙᓯᓐᓂᐹᖅ. ᑲᖏᕐᓱᒍᓗᒻᒦᓱᓂ ᓄᓇᓕᖓ ᖃᕐᖃᓄᑦ ᐃᓗᓚᐅᒪᔪᖅ ᕿᑭᕐᑕᓰᑦ ᐃᑭᕋᓴᖏᑦᑕ ᑭᖏᓐᓂᓴᓄᑦ, ᓄᕘᑉ ᑕᓯᐅᔭᕐᔪᐊᓗ ᑲᑎᓂᖓᓂᕐᓱᓂ.

ᐃᓄᒋᐊᑦᑑᓂᖓ: 395
ᐊᒥᓱᙳᐸᓪᓕᐊᓂᖏᑦ: 6,2%
ᐃᓄᑐᐃᓐᓀᑦ ᐅᓄᕐᓂᖏᑦ: 94,6%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᑕᕆᐅ ᐊᕐᖁᓇᕐᓯᑎᒃ ᕿᑭᕐᑕᓰᑦ ᐃᑭᕋᓴᖓᓂ

ᐊᑑᑎᔭᐅᓯᒪᔪᑦ: ᐊᕐᕌᒍᐃᑦ 4,000 ᓈᓕᕐᑐᑦ ᐅᓪᓗᒥᒧᑦ ᑖᕙᓐᓇ ᓄᓇᓯᒪᕕᐅᓕᕐᑎᓗᒍ. ᓯᕗᓪᓕᐹᑦᓯᐊᒥ ᐃᓄᐃᑦ ᑕᕆᐅᕐᔪᐊᑉ ᐊᑭᐊᓂᒥᐅᔦᓪᓗ ᑲᑎᐅᑎᒋᐊᙵᓚᐅᕐᑐᕕᓃᑦ 1610-ᒥ, ᕿᐊᓐᔨ ᖃᑦᓴᓐ ᑎᑭᒋᐊᙵᐅᑎᖓᓂ. ᑲᒻᐸᓂᒃᑯᑦ ᓂᐅᕕᕐᕕᖏᑦ ᐅᒃᑯᐃᓚᐅᕐᑐᕕᓃᑦ 1909-ᒥ, ᐊᒻᒪᓗ ᐃᑦᓯᔭᕐᔪᐊᑯᑦ ᑖᕙᓂ ᐅᒃᑯᐃᖔᕐᑐᕕᓂᐅᒻᒥᓱᑎᒃ 1938-ᒥᑦ 1960-ᒧᑦ. 1947-ᒥᓂᑦ ᑭᖑᓂᖓᒍᓪᓗ, ᐃᓄᐃᑦ ᑖᕗᖓ ᓄᓇᑖᕐᐸᓕᐊᓯᔪᕕᓃᑦ ᑲᒻᐸᓂᒃᑯᓄᑦ ᐃᑦᓯᔭᕐᔪᐊᑯᓐᓄᓗ ᓄᓇᕐᖃᑎᐅᓯᑦᓱᑎᒃ. ᑯᐊᐸᐅᑉ ᓂᐅᕕᕐᕕᖓ ᐅᒃᑯᐃᑎᓪᓗᒍ 1967-ᒥ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1981-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Notre-Dame d'Ivugivik, Cape Wolstenholme


Map of Akulivik

ᐊᑯᓕᕕᒃ
ᑲᑭᕙᐅᑉ ᑲᐱᓯᒍᑎᖓ ᕿᑎᖓᓂᑦᑐᖅ

60°49'07"N
078°08'55"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 23 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ ᓄᓇᓕᐅᑉ ᐊᖏᓂᖓ: 558.3 km2
ᓄᓇᙳᐊᒥ ᓇᓃᓐᓂᖓ: ᑕᓯᐅᔭᕐᔪᐊᑉ ᑎᑭᕋᖓᓂᑦᓱᓂ ᐃᓪᓗᑯᑖᑦ ᑰᖓᑕ ᓯᕿᓂᖓᓂᑦᓱᓂ ᐊᒻᒪᓗ ᑕᓯᐅᔭᕐᔪᐊᑉ ᐃᑎᓂᖓᑕ ᑕᕐᕋᖓᓂᑦᓱᓂ.

ᐃᓄᒋᐊᑦᑑᓂᖓ: 684
ᐊᒥᓱᙳᐸᓪᓕᐊᓂᖏᑦ: 10,3%
ᐃᓄᑐᐃᓐᓀᑦ ᐅᓄᕐᓂᖏᑦ: 95,1%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᓄᓇᖓ ᑲᑭᕙᒻᒥᒃ ᐃᕐᙯᓇᕐᑐᖅ, ᐅᕝᕙᓘᓐᓃᑦ ᐃᓄᐃᑦ ᐱᐅᓯᑐᖃᖏᑎᒍᑦ ᐃᖃᓗᓐᓂᐊᕈᑎᖓᓂᒃ ᑲᐱᓯᒍᑎᒥᒃ.

ᐊᑑᑎᔭᐅᓯᒪᔪᑦ: ᑖᕙᓐᓇ ᓄᓇᓯᒪᕕᐅᓯᒪᓕᕐᑐᖅ ᐊᕐᕌᒍᓂ ᓴᐅᓴᓂ ᐊᒥᓱᒐᓛᓂ. 1992 ᐊᒻᒪᓗ 1952 ᐊᑯᓐᓂᖓᓂ, ᑲᒻᐸᓂᒃᑯᑦ ᓂᐅᕕᕐᕕᓂᒃ ᐅᒃᑯᐃᓯᕙᓪᓕᐊᔪᕕᓃᑦ, ᑭᓯᐊᓂ ᑭᖑᓂᖓᒍᑦ ᐃᓄᓐᓂᒃ ᑖᕙᓂ ᕿᒣᓐᓀᓯᒪᔪᑦ ᓱᓇᖃᑦᔭᑎᓐᓇᒋᑦ ᓂᐅᕕᕐᕕᒥᓂᒃ ᐅᒃᑯᐊᓯᒐᒥ. ᐃᓄᐃᑦ ᐃᓚᖏᑦ ᐳᕕᕐᓂᑐᒧᑦ ᐊᐅᓪᓛᑐᕕᓃᑦ. ᒪᓕᕐᖃᔭᙱᓂᖏᑦ ᕿᒣᓐᓇᑕᐅᑐᐃᓐᓇᓯᐊᕐᓱᑎᒃ, ᓄᓇᓕᒻᒥᐅᒍᖃᑎᒥᓄᑦ ᑲᒪᒋᔭᐅᑐᐃᓐᓇᒨᓯᑎᓪᓗᒋᑦ. 1973-ᒥ, ᐃᓚᒌᑦ ᑖᕗᖓ ᐊᑯᓕᕕᒻᒧᑦ ᐅᑎᕐᐸᓕᐊᓯᓐᓂᒥᔪᑦ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1979-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Cape Smith


Map of Puvirnituq

ᐳᕕᕐᓂᑐᖅ
ᓄᓇ ᓂᕿᕕᓂᐊᓗᓐᓂᒃ ᒪᒣᑦᑑᓕᕐᑐᓂᒃ ᐱᑕᖃᓚᐅᕐᓂᒪᑦ ᐳᕕᕐᓂᑑᓚᕿᔪᖅ

60°03'02"N
077°17'13”W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 23 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 626.5 km2
ᓄᓇᙳᐊᒥ ᓇᓃᓐᓂᖓ: ᑕᕐᕋᒦᓐᓂᓴᐅᑦᓱᓂ ᐳᕕᕐᓂᑑᑉ ᑰᖓᓂᑦ, ᑰᖓᓗ ᑰᑦᓱᓂ ᑕᕐᕋᒧᑦ ᐳᕕᕐᓂᑑᑉ ᑕᓯᐅᔭᖓᓄᑦ, ᑕᓯᐅᔭᕐᔪᐊᒧᑦ.

ᐃᓄᒋᐊᑦᑑᓂᖓ: 1824
ᐊᒥᓱᙳᐸᓪᓕᐊᓂᖏᑦ: 7,1%
ᐃᓄᑐᐃᓐᓀᑦ ᐅᓄᕐᓂᖏᑦ: 92,9%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᒪᕐᕈᓂᒃ ᐅᓂᒃᑳᑐᐊᓂᒃ ᒪᓂᔭᐅᔪᖃᕐᓯᒪᔪᖅ ᓄᓇ ᖃᓄᖅ ᐊᑦᓯᕋᕐᑕᐅᒍᑎᑖᓚᐅᕐᓂᒪᖔᑦ. ᓯᕗᓪᓕᖅ, ᑐᒃᑐᐃᑦ ᑰᒃᑯᑦ ᐃᑳᕋᓱᐊᕐᓱᑎᒃ ᐃᖏᕐᕋᓂᖅ ᓲᖑᓗᐊᕐᒪᑦ ᑐᒃᑐᐃᑦ ᐊᒥᓱᐊᓗᐃᑦ ᐃᒫᓚᐅᕐᑐᕕᓂᐅᓂᕋᕐᑕᐅᔪᑦ. ᑐᒃᑐᕕᓃᑦ ᓄᓇᓕᐊᕉᑉ ᓯᑦᔭᖓᓂ ᒪᒣᓪᓕᔪᐊᓘᑦᓱᑎᒃ ᓱᒃᑯᓚᐅᕐᓂᒪᑕ ᐳᕕᕐᓂᑑᓂᕋᕐᑕᐅᓚᕿᔪᖅ. ᐁᑉᐸᖓᓕ ᐅᓂᒃᑲᐅᓯᐅᒻᒥᔪᖅ ᐃᓄᐃᑦ ᑐᖁᕋᓚᐅᕐᑐᕕᓂᐅᓂᕋᕐᑕᐅᓱᑎᒃ ᓄᓇᓕᒻᒥᐅᓕᒫᑲᓵᑦ ᑐᖁᑎᓪᓗᒋᑦ, ᐃᑭᑦᑐᐊᐲᑦ ᐊᓐᓇᑎᓪᓗᒋᑦ, ᐃᓗᕕᕐᓯᔪᑦᓭᕈᑦᑎᓗᒍ ᑐᖁᕋᕐᑐᓂᒃ. ᑖᕙᓐᓇ ᓄᓇᖓ ᒪᒣᓪᓕᔪᐊᓘᓚᐅᕐᓂᒪᑦ ᑐᖁᕋᕐᑐᐃᑦ ᑎᒥᕕᓂᖏᑦ ᑎᑉᐸᑐᐊᓘᑎᓪᓗᒋᑦ.

ᐊᑑᑎᔭᐅᓯᒪᔪᑦ: ᑲᒻᐸᓂᒃᑯᑦ ᑖᕗᙵᓚᐅᕐᑐᕕᓃᑦ 1921-ᒥ, ᓂᐅᕕᕐᕕᒥᑦ ᐅᒃᑯᐃᓯᑦᓱᑎᒃ 1951-ᒥ. ᐊᑯᓕᕕᒻᒥ ᓂᐅᕕᕐᕕᒃ ᐅᒃᑯᐊᒪᑦ 1952-ᒥ, ᐊᑯᓕᕕᒻᒥᐅᑦ ᐳᕕᕐᓂᑐᒧᑦ ᐊᐅᓪᓛᖁᔭᐅᓯᔪᕕᓃᑦ. ᐃᑦᓯᔭᕐᔪᐊᑦ 1956-ᒥ ᐅᒃᑯᐃᑎᓪᓗᒋᑦ, ᕿᓪᓕᓴᔭᒥᒃ ᓴᓇᐅᒐᕐᑎᓄᑦ ᑲᑐᑦᔨᖃᑎᒌᓐᓂᒥᒃ ᐳᕕᕐᓂᑐᒥ ᓄᐃᑦᓯᖁᔨᑦᓱᑎᒃ ᑫᓪᓗᐊᓚᐅᕐᑐᕕᓂᐅᒻᒪᑕ, ᑯᐊᐸᓯᓚᐅᕐᑐᕕᓃᑦ ᐳᕕᕐᓂᑐᒥᐅᑦ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1989-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Povungnituk


Map of Inukjuak

ᐃᓄᑦᔪᐊᖅ
ᐃᓄᑦᔪᐊᑦ (ᐃᓄᐃᑦ ᐊᒥᓱᐃᑦ)

58°28'19"N
078°04'37"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 25 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 561.2 km2
ᓄᓇᙳᐊᒥ ᓇᓃᓐᓂᖓ: ᓄᓇᓕᖓ ᐃᓄᑦᔪᐊᑉ ᑰᖓᑕ ᑕᕐᕋᕙᓯᖓᓂᑦᑐᖅ, ᑕᓯᐅᔭᕐᔪᐊᒥ.

ᐃᓄᒋᐊᑦᑑᓂᖓ: 1733
ᐊᒥᓱᙳᐸᓪᓕᐊᓂᖏᑦ: 7,0%
ᐃᓄᑐᐃᓐᓀᑦ ᐅᓄᕐᓂᖏᑦ: 95,3%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᑖᕙᓂ ᐃᓄᐃᑦ ᑎᑭᑕᐅᓚᐅᕐᑐᕕᓂᐅᒻᒪᑕ ᐊᒥᓱᐊᓗᓐᓄᑦ ᐃᓄᓐᓄᑦ ᐃᒪᒃᑯᑦ ᖃᔭᕐᑐᑐᓄᑦ. "ᐃᓄᑦᔪᐊᑦ1 ᐃᓄᑦᔪᐊᑦ1" ᓚᔪᖃᓚᐅᕐᓂᒪᑦ, "ᐃᓄᓐᓂᒃ ᐊᒥᓲᓂᕂᕙᓪᓛᔪᖅ ᐃᓄᑦᔪᐊᑦ." ᓚᔪᖅ.

ᐊᑑᑎᔭᐅᓯᒪᔪᑦ: ᑐᓂᕐᑕᓂᐊᕐᑎᓄᑦ ᓴᒡᒐᑕᐅᓯᒪᔪᑦ ᑖᕙᓂ ᖃᐅᔨᒪᓇᕐᑎᓯᔪᑦ ᐃᓄᑦᑕᖃᕐᓯᒪᓕᕆᐊᖓᓂᒃ ᐊᕐᕌᒍᓂ ᓴᐅᓴᓂ ᐊᒥᓱᒐᓛᓂ. ᐅᐃᒍᐃᒃᑯᑦ ᓂᐅᕕᕐᕕᒥᑦ ᐅᒃᑯᐃᓯᓚᐅᕐᑐᕕᓃᑦ 1900 ᐊᕐᕌᒍᖏᑦ ᐱᒋᐊᕐᖃᒥᐅᑎᓪᓗᒋᑦ. ᑲᒻᐸᓂᒃᑯᑦ ᐅᒃᑯᐃᑎᓪᓗᒋᑦ 1920-ᒥ. 1936-ᒥ, ᐅᐃᒍᐃᒃᑯᑦ ᓂᐅᕕᕐᕕᖏᑦ ᑲᒻᐸᓂᒃᑯᓄᑦ ᓂᐅᕕᕐᑕᐅᓕᕐᓂᒥᔪᑦ, 1958-ᒍᓕᕋᑕᕐᑎᓗᒍ ᑖᕙᓂᑦᑐᕕᓂᐅᑦᓱᑎᒃ. ᐊᖕᓕᑲᒃᑯᑦ ᑖᕗᙵᑎᓪᓗᒋᑦ 1927-ᒥ, ᐊᒻᒪᓗ ᐊᓪᓚᓯᒪᔪᕐᓂᐊᕕᒃ ᐊᒻᒪᓗ ᐳᓖᓯᒃᑯᑦ ᐅᒃᑯᐃᑎᓪᓗᒋᑦ 1935-ᒥ. ᓄᓇᓕᐊᕈᖅ ᐋᓐᓂᐊᓯᐅᑎᒃᑯᓄᑦ ᐅᒃᑯᐃᕕᐅᓕᕐᓂᒥᔪᖅ 1947-ᒥ ᐊᒻᒪᓗ ᐃᓕᓴᕐᕕᑖᕐᓱᓂ 1951-ᒥ. ᑯᐊᐸᖓ ᐅᒃᑯᐃᑎᓪᓗᒍ 1962-ᒥ.

1953-ᒥ, ᑲᓇᑕᒥᐅᑦ ᑲᕙᒪᒃᑯᖏᑦ ᐃᓄᑦᔪᐊᒥᐅᓂᒃ ᐊᐅᔪᐃᑦᑐᒧᑦ ᖃᐅᓱᐃᑦᑐᒧᓪᓗ ᐊᐅᓪᓛᑎᑦᓯᓯᒪᔪᑦ, 2,000 ᑭᓛᒥᑕᓄᑦ ᐅᖓᓯᓐᓂᖃᕐᑐᒧᑦ ᐃᓄᑦᔪᐊᒧᑦ, ᖁᑦᓯᑐᖅ ᑲᓇᑕᒥᐅᓄᑦ ᑖᕙᓐᓇ ᐃᓄᑦᑕᖃᖁᔭᐅᓐᓂᒪᑦ ᑲᕙᒪᒃᑯᓄᑦ ᑲᓇᑕᒧᑦ ᐱᒋᔭᐅᓂᕋᕐᑕᐅᒍᒪᑦᓱᓂ. ᐆᓀᑦᑐᐊᓗᒻᒥ ᐃᓅᒋᐅᕐᓴᕆᐊᓕᕕᓃᑦ ᐃᓚᒥᓂᓗ ᐊᕕᑦᓯᑎᑕᐅᑦᓱᑎᒃ ᐊᕐᓱᕈᓐᓇᑐᐊᓗᒃᑰᑎᑕᐅᓯᒪᔪᑦ. 1996-ᒥ, ᑲᕙᒪᒃᑯᑦ ᑮᓇᐅᔭᓂᒃ ᐅᑎᕐᕕᐅᑎᑦᓯᒍᑎᖃᕐᓯᒪᔪᑦ ᐊᒻᒪᓗ ᐃᓅᖏᓐᓈᑐᓂᒃ ᓭᒻᒪᐅᑎᖃᑎᒌᒍᑎᒥᓂᓪᓗ ᓇᓗᓀᕐᓯᓯᒪᑦᓱᑎᒃ ᐊᐅᓪᓛᑎᑕᐅᓂᑯᓂᒃ ᑭᖑᕚᖏᓐᓂᓗ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1980-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Port Harrison


Map of Umiujaq

ᐅᒥᐅᔭᖅ
ᐅᒥᐊᒍᔮᕐᑐᖅ

56°32'10"N
076°31'06"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 76 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 571 km2
ᓄᓇᙳᐊᒥ ᓇᓃᓐᓂᖓ: ᑕᓯᐅᔭᕐᔪᐊᑉ ᓯᑦᔭᖓᓃᒐᓛᑦᓱᓂ, 15 ᑭᓛᒥᑕᓄᑦ ᐅᖓᓯᓐᓂᖃᕐᑐᖅ ᑐᕐᓱᔫᑉ ᑕᓯᐅᔭᖓᓄᑦ, ᓄᓇᒦᓐᓂᓴᐅᑎᓪᓗᒍ ᑕᓯᐅᔭᖅ.

ᐃᓄᒋᐊᑦᑑᓂᖓ: 454
ᐊᒥᓱᙳᐸᓪᓕᐊᓂᖏᑦ: 1,3%
ᐃᓄᑐᐃᓐᓀᑦ ᐅᓄᕐᓂᖏᑦ: 93,6%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᓄᓇᓕᖓ ᐅᒥᐅᔭᐅᑉ ᓵᖓᓂᑦᑐᖅ, ᐃᓄᐃᑦ ᐅᒥᐊᕆᕙᓚᐅᕐᑕᖓᑕ ᐊᑦᔨᒐᓛᖓᓂ ᓄᓇ ᐅᒥᐅᔭᕐᑕᓕᒃ.

ᐊᑑᑎᔭᐅᓯᒪᔪᑦ: 1975-ᒥ ᔦᒥᔅ ᐯᒥᐅᓄᑦ ᐊᒻᒪᓗ ᑯᐯᒃ ᑕᕐᕋᖓᓂᒥᐅᓄᑦ ᐊᖏᖃᑎᒌᒍᑎᐅᓯᒪᔫᑉ ᐃᓗᐊᓂ ᐅᖃᕐᓯᒪᔪᕐᑕᖃᕐᒪᑦ ᐃᓄᐃᑦ ᑰᑦᔪᐊᕌᐱᒻᒥᐅᑦ ᓅᑕᐅᒐᔭᕐᑎᓗᒋᑦ ᒍᒪᓂᖏᑦ ᑐᕐᓱᔫᑉ ᑕᓯᐅᔭᖓᓄᑦ. ᓄᓇᓕᒃ ᓄᑖᖅ ᓄᐃᑕᐅᓚᕿᓯᒪᔪᖅ 1986-ᒥ ᐃᓄᐃᑦ ᐱᐅᓯᑐᖃᕐᒥᑎᒍᑦ ᐃᓅᒍᓯᕐᓂᒃ ᐊᕙᑎᖃᖁᓪᓗᒋᑦ ᐆᒪᔪᖃᑦᓯᐊᑐᒥ ᐃᖃᓗᖃᑦᓯᐊᑐᒥᓗ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1986-ᒥ


Map of Kuujjuarapik

ᑰᑦᔪᐊᕌᐱᒃ
ᑰᑦᔪᐊᕌᓗᐊᐱᒃ

55°16'55"N
077°45'55"W

ᑕᕆᐅᒥᑦ ᐃᒪᕐᒥᑦ ᖁᒻᒧᑦ ᓄᓇᖓ ᕿᖏᓐᓂᒥᑦᑐᖅ: 10 ᒦᑕᓄᑦ
ᐱᕈᕐᕕᐅᓲᒍᓂᖓ ᓄᓇᖓᑕ: ᓄᓇ ᓇᐹᕐᑐᖃᙱᑐᖅ ᐱᕈᕐᕕᐅᓗᐊᙳᐊᓲᖅ ᐅᕐᐱᓄᑦ ᐊᑦᔨᒐᓚᖏᓐᓄᓗ
ᓄᓇᓕᐅᑉ ᐊᖏᓂᖓ: 15.3 km2
ᓄᓇᙳᐊᒥ ᓇᓃᓐᓂᖓ: ᓯᕿᓂᕐᓯᒦᓐᓂᐹᖅ ᓄᓇᕕᒻᒥ, ᑰᑦᔪᐊᕌᐱᒃ ᑰᑉ ᐹᖓᓂᑦᑐᖅ, ᑕᓯᐅᔭᕐᔪᐊᑉ ᓯᑦᔭᖓᓂ.

ᐃᓄᒋᐊᑦᑑᓂᖓ: 707
ᐊᒥᓱᙳᐸᓪᓕᐊᓂᖏᑦ: 6,3%
ᐃᓄᑐᐃᓐᓀᑦ ᐅᓄᕐᓂᖏᑦ: 75,6%

ᓄᓇᐅᑉ ᐊᑦᓯᕋᕐᑕᐅᒍᓯᖅᑳᕕᓂᖓ: ᕿᓚᓗᒐᕐᑕᖃᓲᒍᑦᓱᓂ ᑰᑦᔪᐊᖅ

ᐊᑑᑎᔭᐅᓯᒪᔪᑦ: ᑖᕙᓐᓇ ᓄᓇᓕᖃᕐᕕᐅᔪᖅ ᒪᕐᕈᐃᓄᑦ (ᐃᓄᓐᓄᑦ ᐊᓪᓚᓄᓪᓗ ᑯᔩᓄᑦ), ᑰᑦᔪᐊᕌᐱᒃ ᐊᑦᓯᕋᕐᑕᐅᒍᓯᖃᕐᒥᔪᖅ ᒍᐊᑉᒪᑰᔅᑐᐃ-ᒍᓂᕋᕐᑕᐅᓱᓂ, ᐊᓪᓚᑎᑐᑦ ᑐᑭᖓ "ᕿᓚᓗᒐᓕᒃ." ᑖᕙᓐᓇ ᓄᓇᓯᒪᕕᐅᓯᒪᓕᕐᑐᖅ ᐊᕐᕌᒍᓂ 2,800-ᓂ ᐅᓪᓗᒥᒧᑦ ᐃᓄᐃᑦ ᐊᓪᓓᓗ ᓯᕗᓪᓕᕕᓂᖏᓐᓄᑦ.

1820-ᒥ ᑲᒻᐸᓂᒃᑯᑦ ᐅᒃᑯᐃᓚᐅᕐᑐᕕᓃᑦ ᑰᑦᔪᐊᒍᓂᕋᕐᑕᐅᖏᓐᓈᑎᓪᓗᒍ ᐃᓄᓐᓄᑦ (ᖃᓪᓗᓈᑎᑐᑦ Great Whale River-ᒍᓂᕋᕐᑕᐅᓯᒪᔪᒥ) ᑕᒐᑕᒐ ᐅᓪᓗᒥ ᓄᓇᓕᐅᓕᕐᑐᒥ. ᐊᖕᓕᑲᒃᑯᑦ ᓄᐃᓯᒪᔪᑦ 1882-ᒥ, ᐃᑦᓯᔭᕐᔪᐊᑯᑦ 1890-ᒥ ᓄᐃᓯᒪᑎᓪᓗᒋᑦ ᑖᕙᓂ.

ᓯᓚᕐᔪᐊᒥ ᐅᓇᑕᕐᓂᔪᐊᖃᕐᑎᓗᒍ ᑐᖓᓕᖓᓂᒃ, ᐊᒥᐊᔨᑲᒥᐅᑦ ᐅᓇᑕᕐᑎᖏᑦ ᑖᕙᓂ ᓄᓇᓯᒪᔪᑦ ᐊᒻᒪᓗ ᒥᕝᕕᖃᕐᓱᑎᒃ, ᑲᓇᑕᐅᑉ ᑲᕙᒪᒃᑯᖏᓐᓅᑕᐅᓯᒪᔪᖅ 1948-ᒥ. ᐅᓇᑕᕐᑎᓄᑦ ᓈᓚᐅᑏᑦ ᓴᓇᔭᐅᓯᒪᔪᑦ ᑖᕙᓂ 1955-ᒍᑎᓪᓗᒍ; ᐅᒃᑯᐊᑕᐅᑦᓱᑎᒃ 1965-ᒥ. ᔦᒥᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᐅᑉ ᐃᓗᐊᓂ ᐅᖃᕐᓯᒪᔪᕐᑕᖃᕐᒪᑦ ᐃᓄᐃᑦ ᑰᑦᔪᐊᕌᐱᒻᒥᐅᑦ ᐃᓚᖏᑦ ᑐᕐᓱᔫᑉ ᑕᓯᐅᔭᖓᑕ ᓄᓇᖓᓄᑦ ᐊᐅᓪᓛᑎᑕᐅᒍᓐᓇᓯᓯᒪᔪᑦ, ᐊᒥᓱᑲᓪᓓᑦ ᐃᓄᐃᑦ ᐅᒥᐅᔭᒧᑦ ᓅᑦᓯᒪᔪᑦ, ᐃᑯᒪᓐᓂᐊᑎᒃᑯᑦ ᑰᑦᔪᐊᕌᐱᒃ ᐊᕙᑎᖓ ᓱᒃᑯᑕᐅᓂᐊᙴᕆᑦᓱᒍ ᓅᒍᒪᓯᒪᒻᒪᑕ.

ᐱᖁᔭᑎᒍᑦ ᐃᓕᑕᕆᔭᐅᓂᕐᑖᓯᒪᔪᖅ ᓄᓇᓕᐊᕉᓂᖓ: 1980-ᒥ

ᖃᓪᓗᓈᑎᑐᑦ ᖃᐅᔨᒪᔭᐅᒍᓯᖃᕐᑐᕕᓂᐅᑦᓱᓂ: Great Whale River, Poste-de-la-Baleine

Back to Top