Skip to Main Contents

ᓄᓇᙳᐊᑦ | ᐃᓕᑕᕆᔭᐅᓂᕐᑖᑐᑦ | ᖃᐅᔨᒋᐊᕐᕕᒋᑎᒍᑦ | Français | English

Historical photograph of an Inuit family in front of a summer camp tent.

ᐃᓄᑦᑕᖏᑦ

(ᖃᓪᓗᓈᕐᑎᑑᕐᑐᐃᓐᓇᑐᑦ) Inuit group, Fort Chimo, 1896. Photographer: A.P. Low, Library and Archives Canada C-005591

ᐃᓄᐃᑦ ᖃᓄᐃᑦᑐᑰᕐᓯᒪᓂᖏᑦ

ᐅᓪᓗᒥᐅᓕᕐᑐᖅ ᐃᓄᐃᑦ ᐃᓄᑐᐃᓐᓇᖄᕕᓂᕐᓄᑦ ᑭᖑᕚᕆᔭᐅᔪᑦ ᐊᒻᒪᓗ, ᓯᑳᓐᑕᓀᕕᐊᒥᐅᑦᓴᔭᐅᑦᓱᑎᒃ ᓄᓇᓂᒃ ᖃᐅᔨᔭᐅᓚᐅᕐᓯᒪᕋᑕᙱᑐᓂᒃ ᕿᓂᕐᑎᓄᑦ ᐃᖃᓗᓐᓂᐊᑎᓄᓪᓗ ᑲᑎᔭᐅᑫᓐᓇᓚᐅᕐᑐᐸᒃᑲᓗᐊᕐᓱᑎᒃ 1500-ᐃᑦ ᐊᕐᕌᒍᖏᓐᓂ, ᐃᓅᒍᓯᖏᑦ ᐊᑦᔨᐅᖏᓐᓂᓴᐅᒪᓪᓗᐊᖏᑦᑐᑦ ᓯᕗᓪᓕᕕᓂᕐᒥᑕ ᐃᓄᑐᐃᓐᓇᖄᕕᓃᑦ ᐱᐅᓯᕆᓯᒪᔭᖏᓐᓂᑦ. ᕿᒻᒥᐅᓂᕐᓴᑯᓪᓕ ᐃᓄᐃᑦ ᓄᓇᕕᒻᒥᐅᑦ ᑕᕆᐅᕐᔪᐊᑉ ᐊᑭᐊᓂᒥᐅᓂᒃ ᑲᑎᔭᐅᖏᓐᓇᓗᑳᖃᑦᑕᓯᒪᔪᐃᑦ ᐊᕐᕌᒍᐃᑦ 1800-ᐃᑦ ᐱᒋᐊᕐᖃᒥᐅᑎᓪᓗᒋᑦ, ᒧᔦᕕᐊᓐᓀᑦ ᑐᑦᓯᐊᕕᓕᕆᔨᖏᑦ ᓄᐃᓚᐅᕐᑐᕕᓃᑦ 1811-ᒥ ᑰᑦᔪᐊᑉ ᑰᖓᓂ, ᐅᓪᓗᒥᐅᓕᕐᑐᖅ ᑰᑦᔪᐊᒥᐅᑦ ᓄᓇᓕᕆᓕᕐᑕᖓᓂ.

Metal half-moon shaped knife with a wooden handle.

(ᖃᓪᓗᓈᕐᑎᑑᕐᑐᐃᓐᓇᑐᑦ) Ulu knife, 1900-1909
McCord Museum Collection, ME930.39.15

ᓱᕐᖁᐃᓇᕐᒥᔫᒐᓗᐊᖅ ᐃᓛᓐᓂᓴᕋᑖᓗᒃ ᐃᑭᕋᓱᐊᕐᔪᐊᑉ ᓄᕗᐊᓂᑉᐸᑐᕕᓂᐅᒋᐊᖏᓐᓂᒃ ᑕᕆᐅᕐᔪᐊᑉ ᐊᑭᐊᓂᒥᐅᔦᑦ ᑕᓯᐅᔭᕐᔪᐊᒥᓗ 1500-ᐃᑦ 1600-ᐃᓪᓗ ᐊᕐᕌᒍᖏᓐᓂ, 1800-ᐃᑦ ᐊᕐᕌᒍᖏᓐᓂ ᑭᓯᐊᓂ 1900-ᐃᑦ ᐱᒋᐊᕐᐸᓕᐊᑎᓪᓗᒋᑦ ᓂᐅᕕᕐᕖᑦ ᓄᐃᑕᐅᓪᓚᕆᓕᑌᓐᓇᑐᕕᓃᑦ. ᐅᖓᕙ ᑕᕆᐅᕐᔪᐊᑉ ᐊᑭᐊᓂᒥᐅᔭᓄᑦ ᑎᑭᑕᐅᖅᑳᓚᐅᕐᑐᕕᓂᖅ 1800-ᐃᑦ ᐊᕐᕋᒍᐃᑦ ᐱᒋᐊᕐᖃᒥᐅᑎᓪᓗᒋᑦ ᐊᒻᒪᓗ ᓂᐅᕕᕐᕖᑦ ᐊᓯᖏᓐᓂᒃ ᐅᒃᑯᐃᑕᐅᒋᐊᓪᓚᑐᖃᓚᐅᕐᓂᔭᒐᓂ 1900-ᐃᑦ ᐊᕐᕌᒍᖏᑦ ᐱᒋᐊᕐᐸᓕᐊᓕᕐᑎᓗᒋᑦ ᑭᓯᐊᓂ ᓂᐅᕕᕐᕕᑖᕐᐸᓕᐊᓯᔪᕕᓂᖅ ᐊᓯᖏᓐᓂᒃ.

ᑲᒻᐸᓂᒃᑯᑦ ᐅᐃᒍᐃᒃᑯᓗ ᓂᐅᕕᕐᕕᖏᑦ ᓯᕗᓪᓕᐹᑦ ᐅᒃᑯᐃᑕᐅᒻᒪᑕ ᑭᓯᐊᓂ ᐃᓄᐃᑦ ᓄᓇᕕᒻᒥᐅᑦ ᐃᓅᖃᑎᒋᔭᐅᕙᓪᓕᐊᓕᑌᓐᓇᑐᕕᓃᑦ. ᓄᓇᕕᒻᒥ ᓯᕗᓪᓕᐹᑦᓯᐊᒍᑦᓱᓂ ᓂᐅᕕᕐᕕᒃ, ᐅᒃᑯᐃᑕᐅᓚᐅᕐᑐᕕᓂᖅ ᐅᒥᐅᔭᐅᑉ ᑕᓯᐅᔭᖓᓂ 1750-ᒥ, 1759-ᒍᑎᓪᓗᒍ ᑰᑦᔪᐊᕌᐱᒻᒧᑦ ᓅᑕᐅᓕᕐᓂᒥᔪᖅ ᑌᓐᓇ ᓂᐅᕕᕐᕕᒃ. ᐊᓯᐊ ᓂᐅᕕᕐᓂᐊᕕᒃ ᓇᑉᐸᑕᐅᓕᓚᐅᕐᓂᒥᔪᖅ ᑰᒃᔪᐊᒥ 1830-ᐅᑎᓪᓗᒍ, ᓈᒻᒪᓯᒻᒪᓗ ᑭᓯᐊᓂ ᐅᒃᑯᐃᑕᐅᕙᑦᑐᒥᒃ ᑕᓯᐅᔭᒥ ᐅᒃᑯᐃᑕᐅᔪᖃᓕᕐᓂᒥᔪᖅ 1833-ᒥ ᐊᒻᒪᓗ ᑲᖏᕐᓱᐊᓗᒃᔪᐊᒥ 1838-ᒥ. ᑖᒃᑯᐊᓕᒫᑦ ᐃᓗᓐᓇᑎᒃ ᓂᐅᕕᕐᓂᐊᕖᑦ ᐅᒃᑯᐊᓚᐅᕐᑐᕕᓃᑦ 1842-ᒥ ᐊᑯᓓᑦᑐᓄᑦ ᓂᐅᕕᕆᐊᕐᕕᐅᓗᐊᕐᖃᔭᕈᓐᓀᕋᒥᒃ. 1866-ᐅᓕᕐᒪᑦ ᑭᓯᐊᓂ ᓂᐅᕕᕐᓂᐊᕕᑦᑖᕙᓪᓕᐊᓯᓕᕐᓂᒥᔪᖅ ᑰᑦᔪᐊᒥᑦᓭᓇᖅ, ᓂᐅᕕᕐᕕᑐᐊᓪᓚᕆᕕᓂᐅᓕᕐᓱᓂᓗ ᐅᖓᕙᓕᒫᒥ 1900-ᐃᑦ ᐊᕐᕌᒍᖏᑦ ᐱᒋᐊᕐᖃᒥᐅᓂᓕᒫᖓᓂ. ᑌᑲᙵᓂᓂᑦ, ᓂᐅᕕᕐᕖᑦ ᓄᓇᕕᒻᒥ ᐊᒥᓱᙳᐸᓪᓕᐊᓯᔪᕕᓃᑦ ᓄᑖᑦ ᑲᒻᐸᓂᓗᑳᑦ ᑎᑭᐅᕐᖃᐸᓪᓕᐊᓕᕐᒪᑕ ᐅᐃᒍᐃᒃᑯᑦ ᐃᓚᐅᒻᒥᑎᓪᓗᒋᑦ, ᑲᒻᐸᓂᒃᑯᓄᑦ ᐱᑖᕆᔭᐅᖔᓕᓚᐅᕐᓯᒪᒻᒥᔪᑦ 1937-ᒥ. ᑖᒃᑯᐊ ᓂᐅᕕᕐᕖᑦ ᓄᐃᑕᐅᓯᒪᓕᕐᒪᑕ ᐃᓄᐃᑦ ᑕᕝᕙᓂᑦᓭᓇᓱᙳᐸᓕᐊᓯᒪᔪᑦ, ᓂᐅᕕᐊᑦᓴᓄᑦ ᐊᑐᐃᓐᓇᐅᕕᐅᓂᕐᓴᐅᓕᕋᒥᒃ ᒥᕐᖁᓕᓐᓄᑦ ᑕᕐᓯᐅᑎᒋᑦᓱᒋᑦ ᓂᐅᕕᕐᐸᓱᑎᒃ.

ᐃᓄᐃᑦ ᓄᓇᓯᒪᕕᒋᕙᑦᑕᕕᓂᖏᑦ ᑐᓂᕐᑕᓂᐊᕐᑎᓄᑦ ᖃᐅᔨᒪᔭᐅᑦᓯᐊᓯᒪᙱᑲᓗᕐᑎᓗᒋᑦ, ᑕᑯᔭᐅᓯᒪᓂᖏᑦ ᐃᓄᑐᐃᓐᓇᖄᕕᓄᑦ ᑭᓯᐊᓂ ᓄᓇᓯᒪᕕᐅᕙᑦᑐᕕᓃᑦ ᑕᑯᔭᐅᓯᒪᔪᑦ. ᓴᓇᕐᕈᑏᑦ ᐆᒪᔪᐃᑦ ᓴᐅᓂᕕᓂᖏᑦ, ᓇᑦᔪᕕᓃᑦ ᐅᔭᕂᓪᓗ ᐊᑐᕐᑕᐅᓭᓐᓇᑐᕕᓃᑦ ᐃᓄᓐᓄᑦ, ᑭᓯᐊᓂ ᓴᕕᕋᔭᕐᓂᒃ ᑭᑭᐊᑦᓴᔭᓂᒃ ᐃᓇᖏᕐᑕᐅᕙᓪᓕᐊᓯᔪᕕᓃᑦ ᖃᐅᑕᒫᕐᓯᐅᑏᑦ, ᐅᑦᑑᑎᒋᓗᒋᒃ ᓄᕝᕗᕆᑦᑑᓱᑎᒃ ᑲᐱᓯᒍᑏᑦ ᐊᒻᒪᓗ ᐊᒻᒪᓗᑭᑕᐅᓕᖓᒐᓛᑦᓱᑎᒃ ᓴᕖᑦ. ᖁᑭᐅᑏᑦ ᐊᖑᓇᓲᑎᐅᕙᑦᑐᕕᓂᕐᓂᒃ ᐃᓇᖐᕙᓪᓕᐊᓯᒪᔪᑦ ᐱᐅᓯᑐᖃᕐᒥᒍᑦ ᐆᒪᔪᕐᓯᐅᕈᑎᐅᖃᑦᑕᑐᕕᓂᕐᓂᒃ. ᐊᓂᕐᕋᖏᑦ (ᑐᐲᑦ, ᐊᐳᑏᑦ ᐃᒡᓗᐃᑦ ᐊᒻᒪᓗ ᐅᔭᕋᓪᓚᓂ ᐃᑦᓯᒥᑕᕆᑦᓱᑎᒃ ᐃᓪᓗᐃᑦ) ᐊᓯᑦᔨᓯᒪᓪᓗᐊᓯᒪᙱᑐᑦ ᑭᓯᐊᓂ ᑐᐲᑦ ᖃᓪᓗᓈᓕᕐᑕᓄᑦ ᐃᓄᐃᑦ ᑐᐱᑦᓴᔭᕆᓲᒍᓕᕐᑕᖏᑦ ᐃᓇᖐᓯᒪᔪᑦ ᐆᒪᔪᐃᑦ ᐊᒥᖏᓐᓂᒃ ᕿᓯᓐᓂᓗ ᑐᐱᓕᐊᒍᕙᓚᐅᕐᑐᕕᓂᕐᓂᒃ. ᐅᔭᕋᓪᓚᓂ ᐃᑦᓯᒥᑕᕆᑦᓱᑎᒃ ᐃᒡᓗᐃᑦ ᓴᓇᔭᐅᖃᑦᑕᖏᓐᓈᑐᕕᓂᐅᓂᐊᙴᕆᔭᐅᔪᑦ 1800-ᐃᑦ ᐊᕐᕌᒍᐃᑦ ᓄᖑᒋᐊᕕᓐᓂᓴᐅᓕᕐᑎᓗᒋᑦ.

← ᐃᓄᑐᐃᓐᓇᖄᕕᓃᑦ (ᐊᕐᕌᒍᐃᑦ 750 ᓈᓯᒪᓕᕐᑐᑦ ᑕᕆᐅᑦᔪᐊᑉ ᐊᑭᐊᓂᒥᐅᔭᓄᑦ ᑎᑭᑕᐅᓚᐅᕐᑐᕕᓂᐅᕐᑎᓪᓗᒋᑦ)
→ ᐃᓄᐃᑦ ᐅᓪᓗᒥᐅᓕᕐᑐᖅ
Back to Top