Skip to Main Contents

ᓄᓇᙳᐊᑦ | ᐃᓕᑕᕆᔭᐅᓂᕐᑖᑐᑦ | ᖃᐅᔨᒋᐊᕐᕕᒋᑎᒍᑦ | Français | English

Close-up of a large black bird flying over a blue sky, with food in its beak.

ᓄᓇᖓ

ᑐᓗᒐᖅ

ᐃᓚᖓᒍᑦ

Row of geese resting, floating on a lake. They are almost all in profile and face each other, like a mirror effect.

ᓂᕐᓕᖅ (Canada goose)
Branta canadensis

ᑕᑭᓂᖃᕈᓐᓇᑐᑦ: 55 - 100 cm
ᐃᓵᖓᑦᓱᑎᒃ ᐃᓴᕈᖏᑦ ᓴᓂᒧᑦ ᐊᖏᓂᖃᕈᓐᓇᑐᑦ: 120 - 185 cm
ᐅᖁᒣᓂᖃᕈᓐᓇᑐᑦ: 1.6 - 5 kg

ᓂᕐᓖᑦ ᑎᒻᒥᓲᒍᑦᓱᑎᒃ ᐊᖏᓂᕐᐸᐅᕗᑦ ᐅᑭᐅᕐᑕᑐᒥ. ᓱᓗᖏᑦ ᓂᕐᓖᑦ ᐊᑦᔨᒌᑐᐃᓐᓀᑦ ᐊᕐᓇᐅᒐᓗᐊᕋᒥᒃ ᐊᖑᑎᐅᒐᓗᐊᕋᒥᓗ. ᐊᐅᔭᐅᓕᕐᒪᑦ (ᐅᐱᕐᖔᖑᓕᕐᒪᑦ) ᐃᓴᕈᖏᑦ ᒥᕐᖁᐃᔭᓲᑦ ᐃᓴᐅᑦᓱᑎᒃ, ᐱᓇᓱᐊᕈᓯᕐᓂ ᑕᓪᓕᒪᓂᑦ ᐱᖓᓲᔪᕐᑐᓄᑦ ᐊᑯᓂᐅᑎᒋᔪᖅ ᐃᓴᐅᓂᕐᒥᓂ ᑎᖏᕐᖃᔭᓲᒍᙱᑐᑦ. ᓂᕐᓖᑦ ᐃᓴᐅᓂᕐᒥᓂ ᐃᒪᓕᒻᒦᒐᓱᐊᓲᑦ ᓂᕿᑦᓯᐊᓂᒃ ᐱᕕᑦᓴᑕᖃᓲᒍᒻᒪᑕ ᐊᒻᒪᓗ ᐊᓐᓇᐅᒪᕕᑦᓴᑕᖃᕐᓱᑎᒃ ᐊᑦᑕᓇᕐᑐᖃᓕᕐᐸᑦ.

ᐅᓪᓗᖃᕙᓪᓗᓲᑦ ᐃᒪᓴᓕᒑᓂ ᐅᕝᕙᓘᓐᓃᑦ ᖃᐅᓯᐅᑦᓱᓂ ᓇᑎᕐᓈᒥ, ᖃᑦᓯᓂᑲᓪᓚᓂᓐᓂᓴᐅᓲᑦ, ᐸᓂᕐᑑᓂᕐᒦᒍᒪᒧᑦ ᐊᒻᒪᓗ ᐆᒪᔪᓄᑦ ᑎᑭᑕᐅᓕᕐᒪᖔᕐᒥᒃ ᑕᑯᓐᓈᕈᓐᓇᕈᒪᒧᑦ. ᐃᓚᖓᓂ ᐃᓗᕐᓴᐅᓂᕐᒥ ᐅᓪᓗᓕᐅᕐᕕᖃᓲᑦ, ᐅᓪᓗᖓᓄᑦ ᑐᙵᕕᐅᓂᐊᕐᑐᒥᒃ, ᐃᕕᒐᐅᔮᓂ, ᐃᕕᓐᓂ, ᐊᒻᒪᓗ ᒪᓃᑦ ᐊᕐᓇᓗᖏᓐᓄᑦ ᑲᑎᕐᓱᑕᐅᓲᒍᒻᒥᔪᑦ ᐃᕙᓕᕈᓂ ᐊᕙᓗᓕᒫᒥᓄᑦ ᐃᓕᓚᖓᑦᓱᒋᑦ. ᖁᓂᒍᕐᒥᓂᒃ ᐅᓪᓗᒥᓄᑦ ᐃᓕᕐᙯᕕᖃᓚᖓᑦᓱᓂ. ᓂᕐᓖᑦ ᐊᕐᕌᒍᑕᒫᑦ ᑖᕗᖓᑦᓭᓇᖅ ᐁᑦᓭᓇᕙᓪᓗᓲᑦ ᒪᓂᓪᓕᐅᕆᐊᕐᑐᓱᑎᒃ. ᐅᐱᕐᖓᓴᐅᓕᕐᒪᑦ ᐊᐅᔭᒥᓗ (ᐅᐱᕐᖔᒥᓗ), ᐃᕕᒐᐅᔮᓂᒃ ᓂᕿᓲᑦ, ᐱᕈᑦᓯᐊᓂᓗ, ᐱᕈᑦᑐᐃᓗ ᐊᒫᖏᓐᓂᒃ, ᓴᐅᓈᖏᓐᓂᒃ ᐊᒻᒪᓗ ᐸᐅᖓᓂᒃ. ᒪᕐᕉᓂᒃ ᐱᖓᓱᓂᓘᓐᓃᑦ ᐊᕐᕌᒍᖃᓕᕋᒥᒃ ᓄᓕᐅᓯᓲᑦ ᐊᒻᒪᓗ ᐁᑉᐸᑕᕋᒥᒃ ᑖᕗᖓᓕᒫᖅ ᑖᑦᓱᒥᖓᑦᓭᓇᖅ ᐃᓅᓂᓕᒫᒥᓂ ᐁᑉᐸᕆᓚᖓᔭᒥᓂᒃ ᐁᐸᑖᓲᑦ. ᐊᕐᓇᓗᐃᑦ ᒪᓐᓂᑖᓲᑦ ᐱᖓᓱᓂᑦ ᓯᑕᒪᐅᔪᕐᑐᓄᑦ ᐊᒥᓲᓂᖃᕈᓐᓇᑐᓂᒃ ᐊᒻᒪᓗ ᐃᕙᓲᒍᑦᓱᒋᑦ ᐅᓪᓗᓂ 25-ᓂᑦ 28-ᒧᑦ ᑎᑭᑦᓱᒍ.


Close-up of a large black bird flying over a blue sky, with food in its beak.

ᑐᓗᒐᖅ (Common raven)
Corvus corax

ᑕᑭᓂᖃᕈᓐᓇᑐᑦ: 55 - 70 cm
ᐃᓵᖓᑦᓱᑎᒃ ᐃᓴᕈᖏᑦ ᓴᓂᒧᑦ ᐊᖏᓂᖃᕈᓐᓇᑐᑦ: 120 - 150 cm
ᐅᖁᒣᓂᖃᕈᓐᓇᑐᑦ: 1 - 1.4 kg

ᑐᓗᒉᑦ ᑐᓗᒐᑦᓴᔭᐅᒻᒥᔪᓄᑦ ᐃᓚᑦᓴᔭᕆᔭᐅᕗᑦ ᐊᒥᐊᔨᑲᒻᒪᕆᓕᒫᒥ. ᑐᓗᒐᑐᐃᓐᓀᑦ ᓲᖑᔪᑲᓪᓚᐅᓲᑦ, ᓯᒡᒍᖏᑦ ᑎᒃᑯᖓᑦᓯᐊᓗᑐᐊᐱᓲᒍᙱᑐᑦ ᓴᖑᖓᒐᓛᑦᓱᑎᒃ, ᕿᕐᓂᑕᓂᒃ ᒥᕐᖁᖃᕐᓱᑎᒃ ᓱᓗᖃᓲᑦ ᑐᖑᓪᓚᖓᒐᓛᑦᑎᓗᒋᑦ ᐃᓚᖏᑦ ᐊᒻᒪᓗ ᐸᐱᑯᑖᖃᓱᑎᒃ ᑕᑭᔪᓂᒃ ᐃᓵᑦᑎᓲᒥᓂᒃ ᑎᒻᒥᓕᕋᒥᒃ ᑭᖏᑦᑐᒥ. ᖃᓄᐃᑦᑐᑐᐃᓐᓇᓕᒫᓂᒃ ᐊᒻᒪᓗ ᐊᑐᐃᓐᓇᕆᓕᑐᐃᓐᓇᑕᒥᓂᒃ ᓂᕆᓲᒍᑦᓱᑎᒃ, ᑐᓗᒉᑦ ᖃᓄᐃᑦᑐᑐᐃᓐᓇᓂᒃ ᐊᑐᐃᓐᓇᐅᔪᑐᐃᓐᓇᓂᒃ ᓂᕆᓲᑦ. ᐆᒪᔪᕕᓂᕐᓂᒃ ᓱᔪᑦᓯᒪᓕᕐᑐᓂᒃ ᓂᕆᓲᒍᑦᓱᑎᒃ, ᒥᑭᔪᕐᓚᐅᓱᑎᓗ ᐱᓱᒃᑎᓂᒃ ᐊᒻᒪᓗ ᑎᒻᒥᐊᑦ ᖁᐸᓄᐊᓪᓘᓃᑦ ᒪᓐᓂᖏᓐᓂᒃ ᑎᓪᓕᒐᓲᒍᒻᒥᓱᑎᒃ. ᐸᐅᕐᖓᓂᒃ ᐱᕈᕐᑐᕕᓂᐅᑦᓱᑎᓪᓗ ᒪᒪᕐᑐᓂᒃ ᓂᕆᓲᒍᒻᒥᔪᑦ.

ᑐᓗᒉᑦ ᐅᓪᓗᖃᓲᑦ ᐊᑦᔨᒌᑦᔭᖏᑦᑐᓂ ᓇᐹᕐᑐᐃᑦ ᖄᖏᓐᓂ, ᑕᕆᐅᒥᓗ ᐃᓐᓈᕈᕐᓂ ᐊᒻᒪᓗ ᐅᔭᕋᓪᓚᓂ. ᐁᐸᑖᕆᓲᑦ ᐊᕐᕌᒍᖃᓕᕋᒥᒃ ᐱᖓᓱᓂᒃ ᐊᒻᒪᓗ ᑖᑦᓱᒥᖓᑦᓭᓇᖅ ᐃᓅᓯᓕᒫᖅ ᐁᑉᐸᖃᓲᒍᑦᓱᑎᒃ. ᐊᑭᕈᕕᓂᕐᓂᒃ ᐊᒻᒪᓗ ᐃᓴᕐᕈᑕᕕᓂᕐᓂᒃ ᑲᑎᕐᓱᐃᓱᑎᒃ ᐅᓪᓗᓕᐅᕐᒥᐅᓲᑦ ᐊᒫᕕᓂᕐᓄᑦ ᒪᕐᕋᒧᓪᓗ ᑲᑎᒪᑎᑕᐅᑎᓪᓗᒋᑦ. ᐃᓗᐊ ᓂᕈᒻᒪᖁᑎᑕᖃᕐᑎᓗᒍ, ᐆᒪᔪᐃᑦ ᒥᕐᖁᕕᓂᖏᓐᓂᒃ. ᐊᕐᓇᓗᐃᑦ ᒪᓐᓂᑖᓲᑦ ᐱᖓᓱᓂᑦ ᓯᑕᒪᐅᔪᖏᒐᕐᑐᓄᑦ ᐅᓄᕐᓂᖃᕈᓐᓇᑐᓂᒃ ᐊᒻᒪᓗ ᐃᕙᓲᒍᑦᓱᑎᒃ ᐅᓪᓗᓂ 18-ᓂᑦ 21-ᓄᑦ ᑎᑭᑦᓱᒍ. ᑐᓗᒉᑦ ᖃᕆᑕᖏᑦ ᐊᖏᓂᕐᓴᐅᓲᑦ ᑎᒻᒥᐊᓂᑦ ᑎᒻᒥᓲᒍᒻᒥᔪᓂᑦ. ᖃᐅᔨᒪᓂᖏᑦ, ᖃᐅᔨᒍᒪᓯᑎᐅᓂᖏᓪᓗ ᐊᒻᒪᓗ ᐱᓀᓗᑕᐅᔪᓂᒃ ᐋᕐᖀᒐᓱᐊᕈᓐᓇᓂᖏᑦ ᐃᓱᒪᑕᐅᒍᑎᒋᓪᓚᕆᑦᑕᖏᑦ ᐆᓀᑦᑐᒪᕆᐊᓗᒻᒥᓗ ᓱᖏᐅᑎᒍᓐᓇᐅᑎᒋᓚᕿᑦᓱᒋᑦ.


Profile of a bird standing on the ground, with thick plumage, white lower body, a brown head and a  white beak.

ᐊᕿᒡᒋᖅ (Rock ptarmigan)
Lagopus mutus

ᑕᑭᓂᖃᕈᓐᓇᑐᑦ: 30 - 35 cm
ᐃᓵᖓᑦᓱᑎᒃ ᐃᓴᕈᖏᑦ ᓴᓂᒧᑦ ᐊᖏᓂᖃᕈᓐᓇᑐᑦ: 50 - 60 cm
ᐅᖁᒣᓂᖃᕈᓐᓇᑐᑦ: 300 - 600 g

ᐅᑭᐅᕐᑕᑐᒥ ᐆᒪᔪᐃᑦ. ᐊᕿᒡᒌᑦ ᐊᑦᔨᐅᖏᑦᑑᒍᑎᖃᓪᓚᕆᑦᑐᐃᑦ ᒥᕐᖁᖏᑦ, ᐱᓗᖏᑦ, ᓱᓗᖏᑦ, ᐊᓯᑦᔨᓯᐊᓲᒍᒻᒪᑕ ᑕᐅᑦᑐᖏᑦ ᐅᑭᐅᒍᓕᑐᐊᕐᒪᑦ ᖃᑯᕐᑕᐅᓱᑎᒃ ᑲᔪᕉᓲᒍᑦᓱᑎᓗ ᓯᓇᕐᓇᐅᓱᑎᓗ ᐊᐅᔭᐅᓕᑐᐊᕐᒪᑦ (ᐅᐱᕐᖔᖑᓕᑐᐊᕐᒪᑦ), ᐃᓴᕈᒥᑕ ᐊᑖᒍᑦ ᖃᑯᕐᑕᖃᑦᓭᓇᓲᖑᒐᓗᐊᑦᓱᑎᒃ. ᑕᐅᑦᑐᖏᑦᑕ ᐊᓯᑦᔨᓲᒍᓂᖏᑦ ᐊᓐᓇᐅᒪᐅᑎᒋᒍᓐᓇᓚᕆᓲᖏᑦ ᐆᒪᔪᓄᑦ ᑕᑯᑦᓴᐅᓴᐅᑎᒋᓲᒍᙱᓇᒥᒃ, ᑎᕆᒐᓐᓂᐊᓄᑦ, ᐊᒪᕈᕐᓄᑦ ᐊᒻᒪᓗ ᑐᓗᒐᕐᓄᑦ. ᐊᕿᔅᒌᑦ ᐱᕈᑦᑐᕕᓂᕐᓂᒃ ᑭᓯᐊᓂ ᓂᕆᓲᑦ, ᐱᕈᕐᑐᐃᑦ ᐅᖃᐅᔭᖏᓐᓂᒃ, ᐱᕈᕐᑐᐃᑦ ᐊᑭᕈᖏᑦ ᐱᕈᕐᐸᓕᐊᑎᓪᓗᒋᑦ ᓂᕆᓲᖏᑦ, ᐱᕈᑦᑐᐃᓗ ᓴᐅᓈᖏᓐᓂᒃ ᐊᒻᒪᓗ ᐱᕈᑦᑐᐃᑦ ᐊᑭᕈᖏᑦ ᐱᕈᕐᓂᐅᓂᕐᓴᐅᓕᕐᑎᓗᒋᑦ. ᐅᓪᓗᓕᐅᓲᑦ ᑕᒪᕐᒥᒃ ᐊᓈᓇᖏᑦ ᐊᑖᑕᖏᓪᓗ.

ᐅᓪᓗᓕᐅᕐᓯᒪᓲᑦ ᓄᓇᒥ ᓴᒡᒐᓯᒪᔭᒥᓂ ᐊᒻᒪᓗ ᐱᕈᑦᑐᕕᓂᓚᑳᑦ ᖃᓕᕆᑦᑎᓱᒋᑦ ᐊᒻᒪᓗ ᐊᓈᓇᖓ ᓈᒥᓂᒃ ᒥᕐᖁᐃᔦᑦᓱᓂ ᒥᕐᖁᑕᑦᓰᓲᖅ ᐅᓪᓗᒥᓂᒃ. ᐊᓐᓇᓗᐃᑦ ᓄᓕᐅᓯᓲᑦ ᐊᕐᕌᒍᖃᓕᕋᒥᒃ ᐊᑕᐅᓯᕐᒥᑦ. ᒪᓐᓂᑖᕈᓐᓇᓲᑦ ᑕᓪᓕᒪᓂᑦ ᓯᑕᒪᐅᔪᕐᑐᓄᑦ ᐅᓄᕐᓂᖃᕈᓐᓇᑐᓂᒃ ᐊᒻᒪᓗ ᐃᕙᓲᒍᑦᓱᑎᒃ ᐅᓪᓗᓂ 10-ᓄᑦ 15-ᓄᑦ ᑎᑭᑦᓱᒍ. ᐅᑭᐅᒍᓕᕐᒪᑦ, ᐊᕿᒡᒌᑦ ᐊᓐᓇᐅᒪᓲᑦ ᐊᐳᑎᐅᑉ ᐃᑭᐊᖓᓂᑦᓱᑎᒃ, ᑎᒻᒥᓱᑎᒃ ᐊᒻᒧᐊᓲᑦ ᐊᐳᑎᐅᑉ ᐃᑭᐊᖓᓅᕐᓱᑎᒃ. ᑐᒥᓕᔮᕐᓂᐊᖏᓐᓇᒥᒃ ᐆᒪᔪᓄᑦ ᒪᓕᑦᑕᐅᒐᔭᕐᑐᓂᒃ.


Profile of a young caribou, grazing in the summer tundra in the morning.

ᑐᒃᑐ (Caribou)
Rangifer tarandus

ᐊᖏᓂᖃᕈᓐᓇᑐᑦ (ᓂᐊᖁᖏᑦ ᑎᒥᖏᓪᓗ): 1.70 - 2.20 m
ᐊᖏᓂᖃᕈᓐᓇᑐᑦ (ᐸᒥᐅᖏᑦ): 10-20 cm
ᑕᑭᓂᖃᕈᓐᓇᑐᑦ (ᑐᐃᒥᒍᑦ): 80 - 120 cm
ᐅᖁᒣᓂᖃᕈᓐᓇᑐᑦ: 60 - 150 kg

ᐅᑭᐅᕐᑕᑐᒥ ᐆᒪᔪᐃᑦ. ᑐᒃᑐᐃᑦ ᐊᒥᓲᓂᕐᐸᐅᔪᑦ ᑯᑭᓕᐅᕐᓱᑎᒃ ᐱᓱᒃᑎᓂᑦ ᐅᑭᐅᕐᑕᑐᒥ. ᐊᑦᔨᒋᔭᐅᙱᒥᔪᑦ ᐊᑦᔨᐸᓱᒋᑦᓱᓂᖏᑦ ᐃᓚᑦᓴᔭᒥᓄᑦ, ᑕᒪᒃᒥᒃ ᐊᕐᓇᐅᒐᓗᐊᕋᒥᒃ ᐊᖑᑎᐅᒐᓗᐊᕋᒥᓗ ᓇᕐᔪᑖᓲᑦ.

ᐊᕐᕌᒍᑕᒫᑦ ᓄᓇᕕᒻᒥ, ᐅᓄᕐᓂᖃᕐᓱᑎᒃ ᒥᐊᓕᓐ ᒥᑦᓵᓂ ᑐᒃᑐᐃᑦ, ᒪᕐᕈᐃᒍᑦᓱᑎᒃ, ᓯᕿᓂᕐᒥᑦ ᑕᕐᕋᒧᑦ ᐊᐅᓚᓲᒍᑦᓱᑎᒃ, ᑕᕐᕋᒧᐊᕐᓂᒥᓂ ᐊᕐᓀᑦ ᓄᕐᕋᓂᒃ ᐱᐊᕋᕐᒥᓂᒃ ᐃᓅᓕᕐᑎᓯᓲᑦ. ᓄᓕᐅᓯᓲᑦ ᐊᕐᕌᒍᖃᓕᕋᒥᒃ ᒪᕐᕉᓂᒃ, ᐊᐅᔭᑕᒫᑦ (ᐅᐱᕐᖔᑕᒫᑦ) ᐊᕐᓀᑦ ᓄᕐᕋᑖᓲᑦ. ᓄᕐᕂᑦ ᐃᓅᓕᕋᑖᕐᖃᒥᐅᑦᓱᑎᒃ ᐱᓱᓯᓲᑦ ᐃᑫᕐᓂᓂ (ᑫᕙᓪᓚᒍᓯᓂ) ᐊᒥᓲᙱᑐᓂ ᐃᓅᓕᕐᑐᕕᓂᐅᕐᓱᑎᒃ. ᐊᐅᔭᖅ (ᐅᐱᕐᖔᖅ) ᐃᓱᓕᒻᒪᑦ, ᑐᒃᑐᐃᑦ ᓯᕿᓂᕐᒧᑦ ᐊᐅᓪᓚᓯᓲᑦ ᐊᕐᓇᓕᙴᑎᕕᒻᒥ. ᐊᐅᓚᓂᕐᒥᓂ, ᐃᓚᖏᑦ ᐃᒻᒥᓂᕐᓱᓱᑎᒃ ᓇᓂᑐᐃᓐᓈᓂᕐᓴᐅᓲᑦ, ᑌᒣᒻᒪᑦ ᐃᕐᐸᓯᒪᓂᕐᓴᐅᓲᑦ ᓄᓇᒥ.

ᑐᒃᑐᐃᑦ ᐱᕈᕐᑐᕕᓂᕐᓂᒃ ᓂᕆᓲᑦ. ᐊᐅᔭᐅᓕᕐᒪᑦ (ᐅᐱᕐᖔᖑᓕᕐᒪᑦ), ᓂᕿᑦᓯᐊᕙᓐᓂᒃ ᓇᑎᕐᓈᓂ ᐱᕈᑦᑐᓂᒃ ᒪᓂᓐᓂᓗ ᓂᕿᖃᓲᑦ. ᐅᑭᐅᒥ, ᖁᐊᕐᓈᓗᒻᒥ ᓂᕿᑦᓴᓯᐅᓲᑦ ᓴᒡᒐᓱᑎᒃ ᓯᑯᒥᑦ ᐊᐳᑎᒥᓪᓗ ᒥᓂᓐᓂᒃ ᕿᓂᕐᓱᑎᒃ, ᓀᕈᕐᓱᑎᒃ ᓀᑦᓱᒋᑦ ᓇᓂᓲᖏᑦ. ᓇᑦᔪᖏᑦᑕ ᐊᒥᖏᓐᓂᒃ ᓂᕆᓲᒍᒻᒥᔪᑦ ᓇᑦᔪᖏᑦ ᐊᖏᓕᕙᓪᓕᐊᓕᑐᐊᕐᒪᑕ. ᑕᒪᒃᑯᐊ ᓇᑦᔪᖏᑦᑕ ᐊᒥᖏᑦ, ᓂᕿᑦᓯᐊᓂᒃ ᐱᑕᖃᕋᒥᒃ, ᓇᑦᔪᓂᒃ ᓄᑖᓂᒃ ᐱᕈᕐᑎᓯᒍᓐᓇᑐᑦ. ᑐᒃᑐᐃᑦ ᓇᑦᔪᖏᑦ ᐲᓲᑦ ᐊᒻᒪᓗ ᐊᕐᕌᒍᑕᒫᑦ ᐱᕈᒋᐊᓪᓚᓲᒍᑦᓱᑎᒃ.


View of a large animal with thick fur and pointed horns, grazing in a clump of low vegetation.

ᐅᒥᒻᒪᖅ (Musk ox)
Ovibos moschatus

ᐊᖏᓂᖃᕈᓐᓇᑐᑦ (ᓂᐊᖁᖏᑦ ᑎᒥᖏᓪᓗ): 1.80 - 2.50 m
ᐊᖏᓂᖃᕈᓐᓇᑐᑦ (ᐸᒥᐅᖏᑦ): 10 - 12 cm
ᑕᑭᓂᖃᕈᓐᓇᑐᑦ (ᑐᐃᒥᒍᑦ): 90 - 160 cm
ᐅᖁᒣᓂᖃᕈᓐᓇᑐᑦ: 220 - 400 kg, 600 kg-ᒧᑦ ᑎᑭᐅᑎᒍᓐᓇᓱᑎᒃ ᐊᖑᑎᐅᑐᐊᕋᒥᒃ

ᐅᒥᒻᒣᑦ ᑕᑯᔭᐅᒍᓐᓇᑐᑦ ᑲᓇᑕᐅᑉ ᐅᑭᐅᕐᑕᑐᓕᒫᖓᓂ. ᐅᒥᒻᒣᑦ ᐆᓀᑦᑐᐊᓗᒻᒥ ᐃᑦᔫᒍᑦᓱᑎᒃ ᒥᕐᖁᒥᓂᒃ ᑕᑭᔪᕐᓛᓗᓐᓂᒃ ᕿᐅᒋᒃᑯᑎᖃᕐᓱᑎᒃ ᐊᕐᕌᒍᑕᒫᓪᓗ ᓄᑖᓂᒃ ᒥᕐᖁᑖᓲᒍᑦᓱᑎᒃ. ᑕᒪᕐᒥᒃ ᐊᖑᑏᑦ ᐊᕐᓀᓗ ᓇᑦᔪᖃᓲᑦ ᑲᐲᒍᑎᒋᓲᖏᑦ ᐆᒪᔪᓂᒃ ᐅᓇᒻᒥᒋᔨᒥᓂᒃ, ᐅᒪᕈᐃᑦ ᐃᕐᓯᓇᕐᓂᐹᑦ ᐅᒥᒻᒪᓄᑦ. ᐊᑦᑕᓇᕐᑐᒦᑦᑐᕆᓕᕋᒥᒃ, ᐃᓄᒻᒪᕆᐅᓂᖏᑦ ᐊᒻᒪᓗᑭᑕᐅᓕᖓᓲᑦ ᓯᓚᑖᓄᑦ ᑕᑯᓐᓇᑐᐃᓐᓇᐅᓱᑎᒃ ᐱᐊᕋᕐᒥᓂᒃ ᐃᓗᐃᓯᒪᑦᓱᑎᒃ ᐅᓇᒻᒥᒋᔭᐅᓕᑐᐊᕋᒥᒃ ᐆᒪᔪᓄᑦ.

ᐅᒥᒻᒣᑦ ᓂᕆᓲᑦ ᐱᕈᑦᓯᐊᑖᓲᓂᒃ ᐅᑭᐅᑕᑐᒥ ᐱᕈᓲᓂᒃ ᐊᒻᒪᓗ ᓇᓂᕐᑖᓂ ᐱᕈᓲᓂᒃ. ᐅᑭᐅᒍᓕᕐᒪᑦ, ᒪᓂᕐᓂᒃ, ᐊᑭᕈᕐᓂᒃ ᐊᒻᒪᓗ ᐃᕕᒐᐅᔮᓂᒃ ᓄᐃᑕᓂᖏᓐᓂᒃ ᓂᕆᓲᑦ. ᑐᒃᑐᑎᑐᑦ, ᐅᒥᒻᒣᑦ ᐅᑭᐅᕐᑕᑐᖅ ᖁᐊᓲᒍᒻᒪᑦ ᐊᐅᓲᒍᑦᓱᓂᓗ ᑌᒣᑦᑑᑎᓪᓗᒍ ᓂᕿᑦᓴᓯᐅᕋᓱᐊᕆᐊᖃᓲᑦ ᐱᕕᑦᓴᕆᒍᓐᓇᑕᒥᓂ.

ᐱᕕᑦᓴᖃᑦᓯᐊᑐᐊᕐᒪᑦ ᓇᔪᕐᑕᖓ ᐊᒻᒪᓗ ᐆᒪᔪᐃᑦ ᐅᓇᒻᒥᕆᔨᖏᑦ ᓇᔪᕐᑕᖓᓂᑦᑐᐃᑦ ᐃᑉᐱᒋᑦᓱᒋᑦ, ᐅᒥᒻᒣᑦ ᑲᑎᒪᑦᓱᑎᒃ ᐅᓄᕐᓂᖏᑦ ᐊᑦᔨᒌᓲᒍᑦᔭᖏᑦᑐᑦ. ᐃᓛᓐᓂ ᐅᓄᕐᓂᐸᐅᒐᓱᐊᒻᒪᕆᓕᕋᒥᒃ 50-ᐅᒍᓐᓇᓲᑦ, ᑲᑎᒪᔪᐃᑦ 5-ᓂᑦ 12-ᓄᑦ ᐅᓄᕐᓂᖃᕙᓪᓗᓲᑦ. ᐊᒥᓱᓪᓗᐊᕋᑎᒃ ᑲᑎᒪᔪᐃᑦ ᐊᑕᐅᓯᕐᒥᒃ ᐊᖑᑎᒥᒃ ᓯᕗᓕᕐᑎᖃᓲᑦ ᐊᕐᓇᓂᒃ ᓄᕐᕋᖏᓐᓂᓗ ᒪᓕᑲᑦᑎᖃᕐᓱᑎᒃ. ᐊᕐᓀᑦ ᓄᓕᐅᓯᓲᑦ ᐊᕐᕌᒍᖃᓕᕋᒥᒃ ᐱᖓᓱᓂᒃ ᐊᒻᒪᓗ ᓄᕐᕋᑖᓱᒍᑦᓱᑎᒃ ᐊᑕᐅᓯᕐᒥᒃ ᐊᕐᕌᒎᒃ ᒪᕐᕉᒃ ᓈᒋᐊᑕᒫᑦ. ᐅᒥᒻᒣᑦ ᐱᐊᕋᖏᑦ ᖃᐅᔨᒻᒪᓂᕋᑕᐅᓲᑦ ᐊᒻᒪᓗ ᐃᓅᓕᕋᑖᑦᓯᐊᓱᑎᒃ ᐃᒻᒧᑐᕋᓱᐊᓯᓲᒍᑦᓱᑎᒃ ᐊᓈᓇᒥᓂᑦ ᐊᒫᒪᓯᑦᓱᑎᒃ. ᐊᕐᓀᑦ ᓄᕐᕋᓂᒃ ᓴᕐᓕᐊᖃᓲᑦ ᑕᕐᕿᓂ 15-ᓂᑦ 18-ᓄᑦ ᑎᑭᑦᓱᒍ, ᐊᓈᓇᐅᔪᑦ ᐃᒻᒧᖃᑦᓯᐊᕆᐊᖃᓪᓚᕆᑦᑐᑦ ᓄᕐᕋᖏᑦ ᒥᑭᔫᓂᖏᓐᓂ ᐅᑭᐅᒥ ᓯᕗᓪᓕᐹᒥ ᐃᓅᓕᕐᑐᕕᓂᐅᑎᓪᓗᒋᑦ ᓄᕐᕋᖏᑦ.


View of a white bear, walking on snow and lit by a setting sun.

ᓇᓄᖅ (Polar bear)
Ursus maritimus

ᐊᖏᓂᖃᕈᓐᓇᑐᑦ (ᓂᐊᖁᖏᑦ ᑎᒥᖏᓪᓗ): 1.90 - 2.40 m (ᐊᖑᑏᑦ) 1.70 - 2.00 m (ᐊᕐᓀᑦ)
ᐊᖏᓂᖃᕈᓐᓇᑐᑦ (ᐸᒥᐅᖏᑦ): 8 - 10 cm
ᑕᑭᓂᖃᕈᓐᓇᑐᑦ (ᑐᐃᒥᒍᑦ): 120 - 150 cm
ᐅᖁᒣᓂᖃᕈᓐᓇᑐᑦ: 350 - 650 kg (ᐊᖑᑏᑦ ᐅᖁᒣᓐᓂᖃᕈᓐᓇᑐᑦ 800 kg), 150 - 300 kg (ᐊᕐᓀᑦ)

ᐊᖏᓂᕐᐹᑦ ᓄᓇᒥ ᐱᓱᒃᑎᓂᑦ. ᓇᓄᐃᑦ ᐆᓀᑦᑐᐊᓗᒻᒥ ᕿᐅᒋᒃᑯᑎᖃᑦᓯᐊᐳᑦ ᒥᕐᖁᒥᓂᒃ, ᐅᕐᓱᒧᓪᓗ ᖁᐃᓂᔫᓂᕐᒥᓄᑦ ᐊᒻᒪᓗ ᕿᕐᓂᑕᒥᒃ ᐅᕕᓂᖃᕋᒥᒃ, ᓯᕿᓂᕐᒧᑦ ᓂᕈᒥᑦᑑᑎᑕᐅᓱᒥᒃ. ᐅᕐᖁᓯᐅᓗᐊᕐᑌᓕᒐᓱᐊᕐᓱᑎᒃ ᐱᓲᒐᓲᒍᒻᒥᔪᑦ, ᐊᕐᐸᖏᕐᑌᓕᑦᔭᒥᒐᑎᒃ ᐅᖓᓯᓐᓂᖃᕈᓐᓇᑐᒧᑦ ᒪᕐᕈᓂᒃ ᑭᓛᒥᑖᓐᓂᒃ ᒋᐊᖃᕈᑎᒃ. ᐳᐃᑦᔪᓯᑎᒻᒪᕆᐅᑦᓱᑎᓗ. ᐃᒫᓂ, ᐃᑎᒐᖏᑦ ᐊᖏᔪᐊᓘᒐᒥᒃ, ᒪᐅᔭᕆᒃᑯᑎᒋᒍᓐᓇᑕᖏᑦ ᐊᐳᑐᒥ, ᐃᑎᒪᐅᔮᕐᑎᓗᒋᑦ ᐊᑐᓲᖏᑦ, ᐊᒻᒪᓗ 1 ᒥᓂᑦᓯᐅᑉ ᐅᖓᑖᓄᑦ ᓯᑦᓯᑐᕐᓯᒪᒍᓐᓇᓱᑎᒃ ᐃᒪᕐᒥᒃ.

ᓇᓄᐃᑦ ᓂᕆᓲᑦ, ᓇᑦᓯᓂᒃ, ᐃᓚᖓᓂ ᐁᕕᕐᓂᒃ ᕿᓚᓗᒐᕐᓂᓘᓐᓃᑦ. ᓇᑦᓰᑦ ᐊᓪᓗᖏᓐᓂᒃ ᓀᒍᓐᓇᑐᑦ 1 ᑭᓛᒥᑕᒥᒃ ᐅᖓᓯᓐᓂᖃᕋᓗᐊᕐᒪᑦ ᐊᒻᒪᓗ ᐅᑭᐅᒍᓂᖓᓂ ᓯᑯᒦᕙᓪᓗᓲᒍᑦᓱᑎᒃ, ᓇᑦᓰᑦ ᓇᔪᒐᖏᓐᓂ. ᓇᓄᐃᑦ ᐆᒪᔫᒻᒥᔪᓂᒃ ᑐᖁᑦᓯᓱᑎᒃ ᓂᕆᓲᒍᒐᓗᐊᕐᒥᓱᑎᒃ, ᐃᑎᔪᒧᑦ ᐊᕐᖃᓲᒍᒻᒥᔪᑦ ᕿᕐᖁᐊᓂᒃ ᑯᐊᓐᓂᓂᓗ ᓂᕆᓇᓱᐊᕐᓱᑎᒃ. ᐊᐅᔭᐅᓕᕐᒪᑦ (ᐅᐱᕐᖔᖑᓕᕐᒪᑦ), ᓄᓇᒦᓲᑦ, ᐸᐅᕐᖓᓂᒃ, ᐃᕕᑦᓱᑲᐅᔭᓂᒃ ᐃᕕᒐᐅᔮᓂᓗ, ᐊᒻᒪᓗ ᒥᑭᔪᕐᓚᐅᓱᑎᒃ ᐱᓱᒃᑎᓂᒃ ᐆᒪᔪᓂᒃ ᓂᕆᓲᒍᒻᒥᓱᑎᒃ ᐅᑦᑑᑎᒋᓗᒋᑦ ᐊᕕᙵᓂᒃ.

ᐊᖑᑏᑦ ᐊᕐᓀᓗ ᓄᓕᐅᓯᓲᑦ ᐊᕐᕌᒍᖃᓕᕋᒥᒃ ᓯᑕᒪᓂᒃ ᑕᓪᓕᒪᓂᓘᓐᓃᑦ. ᓄᓕᐅᓲᑦ ᐁᕆᓕᐅᑉ ᑕᕐᕿᖓᓂ ᒣᒥᓘᓐᓃᑦ, ᑭᓯᐊᓂ ᐊᕐᓇᐅᑉ ᐃᓪᓕᐊᖓ ᐱᐊᕋᑦᓴᒥᓄᑦ ᓱᕋᕐᕕᐅᓯᑌᓐᓇᓲᖅ ᓯᑉᑎᒻᐸᒥ ᐅᒃᑑᐸᒥᓘᓐᓃᑦ. ᓇᓄᐃᑦ ᐊᐳᑎᒥ ᐅᑭᐅᕐᓯᐅᕕᑦᓴᒥᓂᒃ ᓴᒡᒐᓲᑦ ᐅᑭᐅᒍᓂᖓᓂ ᓯᓂᕝᕕᒋᓚᖓᔭᒥᓂᒃ. ᐱᐊᕋᑦᓴᖏᑦ ᐱᕈᒋᑦᓯᐊᑐᐊᕋᒥᒃ ᐅᓪᓗᐃᑦ 60 ᓈᒻᒪᑕ ᐃᓅᓕᓲᑦ, ᐱᖓᓱᓂᒃ ᒥᑦᓯᑐᒍᓪᓘᓃᑦ ᓇᓄᐊᕋᕐᓂᒃ ᐱᐊᕋᕐᑖᓲᑦ. ᐊᓈᓇᒥᑕ ᐃᒻᒧᖓᓄᑦ ᐊᖏᓕᑎᑕᐅᓲᑦ, ᐅᕐᓱᖃᒻᒪᕆᒻᒪᑦ ᐃᒻᒧᖓ. ᐊᕐᓀᑦ ᐅᖁᒣᓐᓂᒥᑕ ᐊᕝᕙᓗᐊᖓᓂᒃ 50%-ᖓᓂᒃ ᓴᓗᓲᖅ ᐱᐊᕋᕐᒥᓂᒃ ᓴᕐᓕᐊᓂᕐᒥᓂ ᐅᑭᐅᒍᑎᓪᓗᒍ. ᐊᓈᓇᖓ ᐱᐊᕋᖏᓪᓗ ᐊᓂᓲᑦ ᕕᕗᐊᕆᐅᑉ ᑕᕐᕿᖓᑕ ᕿᑎᖓᓂ ᐊᒻᒪᓗ ᐁᕆᓕᐅᑉ ᑕᕐᕿᖓᑕ ᕿᑎᖓᓂ. ᓇᓄᐊᕂᑦ ᐊᓈᓇᒥᓃᓲᑦ ᑕᕐᕿᓂ 30-ᓂ, ᑌᒣᒻᒪᑦ ᐊᕐᓀᑦ ᐱᐊᕋᑦᓴᑖᕆᐊᓪᓚᓲᒍᑦᔭᖏᑦᑐᑦ ᐊᕐᕌᒎᓂ ᒪᕐᕉᓂ ᐱᖓᓱᓘᓐᓃᑦ.


Beluga surfacing in the water. The animal is completely white, and it looks at the camera.

ᕿᓚᓗᒐᖅ (Beluga)
Delphinapterus leucas

ᑕᑭᓂᖃᕈᓐᓇᑐᑦ: 3 - 5 m
ᐅᖁᒣᓂᖃᕈᓐᓇᑐᑦ: 500 - 1 500 kg

ᕿᓚᓗᒉᑦ ᐱᖓᓲᒋᐊᑕᒫᑦ ᐃᓚᖓ ᐊᑕᐅᓯᖅ ᐅᑭᐅᕐᑕᑐᒦᖏᓐᓇᓕᒫᓱᑦ. ᓯᓇᕐᓇᒥᒃ ᑲᔪᕐᒥᓘᓐᓃᑦ ᑕᐅᑦᑐᖃᕐᓱᑎᒃ ᐃᓅᓕᓲᑦ ᖃᑯᕐᓯᓲᒍᑦᓱᑎᒃ ᐊᕐᕌᒍᖃᓕᕋᒥᒃ ᐱᖓᓲᔪᕐᑐᐃᑦ ᒥᑦᓵᓂ. ᐊᑦᔨᐸᓱᖏᑦ ᕿᓚᓗᒉᑦ ᑯᔭᐱᒥᒍᑦ ᐸᐱᕈᖃᕐᑎᓗᒋᑦ, ᕿᓚᓗᒉᑦ ᖁᓖᒥᒍᑦ ᖃᑦᓯᑐᑲᓪᓚᖃᑐᐃᓐᓇᑐᑦ. ᑯᔭᐱᒥᒍᑦ ᐸᐱᕈᖃᙱᑑᓚᕿᕐᖂᑐᑦ ᓇᔪᓲᒥᓂ ᓱᖏᐅᑎᒋᐊᖃᕐᓯᒪᔪᑦᓴᐅᒐᒥᒃ, ᓯᑰᐃᑦ ᐊᑖᓂ ᐅᕝᕙᓘᓐᓃᑦ ᓄᕝᕗᕆᑦᑐᑲᓪᓚᐅᓱᑎᒃ ᐅᔭᕋᓪᓓᑦ ᓴᓂᕌᒍᑦ ᓂᕆᒐᓱᐊᕈᓐᓇᓲᑦ. ᐊᑦᔨᐸᓱᒥᓄᑦ ᐊᑦᔨᒋᔭᐅᙱᓚᕆᒻᒥᔪᑦ ᕿᓚᓗᒉᑦ ᑯᔭᐱᒐᖏᑦ ᐊᑕᐅᓯᐅᓕᖓᑐᐃᓐᓇᔭᖏᓐᓇᒥᒃ, ᓂᐊᖁᕐᒥᓂᒃ ᕿᕕᐊᕐᑎᓯᒍᓐᓇᑐᑦ. ᐊᓪᓕᕈᖏᑦ 16-ᓂᑦ 22-ᓄᑦ ᐅᓄᕐᓂᖃᕈᓐᓇᑐᓂᒃ ᑭᒍᑎᖃᓲᑦ. ᐃᒫᒍᑦ ᐳᐃᔪᓕᕋᒥᒃ ᓱᑲᓐᓂᖃᕈᓐᓇᑐᑦ 5 ᑭᓛᒥᑕᓂᑦ 15 ᑭᓛᒥᑕᓄᑦ ᐅᖓᓯᓐᓂᓕᒻᒥᒃ ᐊᒻᒪᓗ ᓂᐅᕆᐊᓲᒍᑦᓱᑎᒃ ᒪᕐᕈᕕᑦᓱᑎᓘᓐᓃᑦ ᐱᖓᓱᕕᑦᓱᑎᓘᓐᓃᑦ 1 ᒥᓂᑦᓯᐅᒋᐊᑕᒫᑦ.

ᕿᓚᓗᒉᑦ ᐊᒥᓱᓄᑦ ᐃᓚᒋᔭᐅᑦᓯᐊᕈᓐᓇᑐᑦ ᐊᒻᒪᓗ ᑲᑎᒪᒍᓐᓇᓲᒍᑦᓱᑎᒃ 5-ᓂᑦ 20-ᓄᑦ ᐅᓄᕐᓯᖃᕈᓐᓇᓱᑎᒃ ᑲᑎᒪᓕᕋᒥᒃ. ᓂᕆᒐᑦᓴᖃᑦᓯᐊᓕᕋᒥᒃ ᐅᕝᕙᓘᓐᓃᑦ ᐅᑎᕐᑕᕕᒋᓲᒥᓄᑦ ᐊᐅᓚᓕᕋᒥᒃ, ᑕᒪᒃᑯᐊ ᐃᑭᑦᑑᓈᕐᑎᓱᑎᒃ ᐊᕕᑦᑐᓯᒪᔪᕕᓂᐅᑦᓱᑎᒃ ᕿᓚᓗᒉᑦ ᑲᑎᓲᑦ ᐅᓄᕐᓂᖏᑦ 10,000-ᓄᑦ ᑎᑭᒍᓐᓇᓲᑦ ᑲᑎᒪᓕᕋᒥᒃ. ᑐᑭᓯᒪᖃᑎᒌᓲᑦ ᐅᕕᙱᐅᓱᓐᓂᑯᑦ, ᙯᒐᓕᕐᓱᑎᒃ ᐊᒻᒪᓗ ᐃᙱᕙᓪᓛᓱᑎᒃ, ᐊᒻᒪᓗ ᖃᑎᑭᑦᑐᒪᕆᐊᓗᓐᓂᒃ ᐃᒥᐊᑎᑦᓯᕙᓪᓛᓱᑎᒃ.

ᐅᑭᐅᒥ, ᐊᐅᒃᑲᓂᕐᒦᓲᑦ (ᑕᕆᐅᒥ ᓯᑯᓯᒪᙱᓂᕐᒥ) ᐅᕝᕙᓘᓐᓃᑦ ᓯᑯᐃᑦ ᓯᓈᓂ. ᐊᐅᔭᐅᓕᕐᒪᑦ (ᐅᐱᕐᖔᖑᓕᕐᒪᑦ), ᓄᓇᐅᑉ ᓯᓈᒎᕐᓱᑎᒃ ᐅᑎᕐᑕᕕᒻᒥᓄᑦ ᐊᐅᓚᓲᒍᑦᓱᑎᒃ, ᑕᕆᐅᖅ ᓯᑯᖃᕈᓐᓀᒪᑦ ᑰᓪᓗ ᐹᖏᓐᓂ ᓂᕈᒥᓐᓂᒥ, ᑕᕆᐅᑭᓐᓂᒥᓪᓗ ᒪᓂᕋᑐᐃᓐᓇᐅᖏᑦᑐᒥ ᒪᑦᑕᒥᓂᒃ ᐊᒥᕂᔦᓲᒍᑦᓱᑎᒃ ᐊᕐᕌᒍᑕᒫᑦ.

ᕿᓚᓗᒉᑦ ᓂᕆᓲᑦ ᐃᖃᓗᓐᓂᒃ (ᐆᒐᕐᓂᒃ, ᓵᒪᓂᒃ ᐃᖃᓗᑉᐱᓂᓪᓗ), ᐃᕐᖃᒥᐅᑕᕐᓂᓗ ᐆᒪᔪᓂᒃ ᐊᑦᔨᒌᑦᔭᖏᑦᑐᓂᒃ. ᓂᕆᒐᑦᓴᓯᐅᓲᑦ ᐊᕐᖃᓱᑎᒃ 800m ᒦᑕᓄᑦ ᐃᑎᓂᓕᒻᒧᑦ.

ᕿᓚᓗᒐᐃᑦ ᐊᑕᐅᓯᑐᐃᓐᓇᐅᖏᑦᑐᒥᒃ ᐊᕐᓇᖃᓲᑦ ᓄᓕᐅᓲᒍᑦᓱᑎᓗ ᐁᕆᓕᒥ ᒣᒥᓗ. ᐊᕐᓀᑦ ᓄᓕᐅᓯᓲᑦ ᓯᑕᒣᑦ ᓯᑕᐅᒪᔪᖏᒐᕐᑐᐃᓗ ᐊᑯᓐᓂᖏᓐᓂ ᐊᕐᕌᒍᖃᓕᕋᒥᒃ, ᐊᖑᑏᑦ ᓄᓕᐅᓯᓲᒍᑎᓪᓗᒋᑦ 8-ᓂᒃ 9-ᓂᓗ ᐊᕐᕌᒍᖃᓕᕋᒥᒃ. ᐊᑕᐅᓯᕐᒥᒃ ᐱᐊᕋᕐᑖᓲᒍᑦᓱᑎᒃ ᐊᓐᓇᐅᑉ ᐃᓪᓗᐊᖓᓂ ᐱᕈᕐᓴᓲᑦ ᑕᕐᕿᓂ 14-ᓂ. 35 kg-ᓂᑦ 85 kg-ᓄᑦ ᐅᖁᒣᓐᓂᖃᕈᓐᓇᓱᑎᒃ ᐊᒻᒪᓗ ᑕᑭᓂᖃᓲᒍᑦᓱᑎᒃ 1.5 ᒦᑕᓂᒃ ᐃᓅᓕᕐᓱᑎᒃ, ᐊᓈᓇᖏᑦ ᐊᒫᒪᑦᑎᓯᓲᑦ ᐱᐊᕋᕐᒥᓂᒃ ᑕᕐᖀᑦ 18-ᓂ. ᐊᕐᓀᑦ ᐱᐊᕋᕐᑖᓲᑦ ᐊᕐᕌᒍᐃ ᐱᖓᓱᑦ ᓈᒋᐊᑕᒫᑦ ᔪᓂᐅᑉ ᐊᐅᒍᔅᑎᐅᓪᓗ ᐊᑯᓐᓂᖓᓂ.


Seal swimming in profile on the surface of the water. It is dark in color and its fins can be seen beneath the surface.

ᓇᑦᓯᖅ (Ringed seal)
Pusa hispida

ᑕᑭᓂᖃᕈᓐᓇᑐᑦ: 1.3 - 1.7 m
ᐅᖁᒣᓂᖃᕈᓐᓇᑐᑦ: 45 - 110 kg

ᐅᑭᐅᕐᑕᑐᒥ ᐆᒪᔪᐃᑦ. ᓇᑦᓰᑦ ᐊᒥᓱᒻᒪᕆᐊᓘᕗᑦ ᐅᑭᐅᕐᑕᑐᒥ. ᓯᓇᕐᓇᐅᓱᑎᒃ ᖃᑯᓪᓕᓂᒃ ᓱᓪᓗᓕᐅᔮᕐᓱᑎᒃ ᐊᒻᒪᓗᑭᑕᐅᓕᖓᒐᓛᑦᑐᓂᒃ ᑕᕐᓴᖃᓲᑦ ᖁᓖᒥᒍᑦ ᕿᕐᓂᑕᐅᓂᒻᒥ ᐅᕝᕙᓘᓐᓃᑦ ᖃᔪᐊᖓᔪᒥ. ᓇᑦᓰᑦ ᓯᕐᖁᖏᑦ, ᓴᖑᐊᒍᑎᒋᓲᖏᑦ ᐃᒫᓂ, ᑯᑭᑯᑖᖃᓱᑎᒃ. ᓇᑦᓰᑦ ᑯᑭᒥᓂᒃ ᑭᒍᑎᒥᓂᓗ ᐊᑐᕐᓱᑎᒃ ᐊᓪᓗᐊᓕᐅᓲᑦ ᓯᑯᒥ. ᓇᑦᓯᐊᕋᐅᓂᕐᒥᓂ ᖃᑯᕐᑕᐅᓲᒍᒑᒥᒃ ᖃᑯᕐᑕᒥᒃ ᐅᓕᑲᑦᑕᖃᕐᓂᕋᕐᑕᐅᓲᑦ ᐃᓅᓕᕐᓱᑎᒃ ᖃᑯᕐᑕᐅᓲᒍᒻᒪᑕ. ᓯᑕᒪᐅᔪᕐᑐᓂᒃ ᐱᓇᓱᐊᕈᓯᖃᓕᕐᓱᑎᒃ, ᒥᕐᖁᐃᔭᓕᕋᒥᒃ ᖁᓖᖏᑦ ᖃᑯᓪᓕᕉᕐᓱᑎᒃ ᓯᓇᕐᓇᕈᓲᑦ. ᐊᕐᕌᒍᖃᓕᑐᐊᕋᒥᒃ ᐊᑕᐅᓯᕐᒥᒃ ᐃᓄᒻᒪᕆᙳᑐᐊᕋᒥᒃ ᒥᕐᖁᖏᑦᑕ ᑕᐅᑦᑐᖏᑦ ᐃᓂᓲᑦ.

ᓇᑦᓰᑦ ᓂᕆᕙᓪᓗᓲᑦ ᐃᖃᓗᓐᓂᒃ ᐊᒻᒪᓗ ᐃᕐᖃᒥᐅᑕᓂᒃ ᐆᒪᔪᓂᒃ ᐊᑦᔨᒌᑦᔭᖏᑦᑐᓂᒃ ᓂᕆᓲᒍᒻᒥᓱᑎᒃ. ᓇᑦᓰᑦ ᐊᑕᐅᓯᐅᑦᔭᖏᑦᑐᒥᒃ ᐊᓪᓗᓕᐅᕐᓯᒪᓲᑦ ᐊᓂᕐᓵᕆᐊᖃᓕᑐᐊᕈᑎᒃ ᐱᕕᑦᓴᖃᑦᓭᓇᕋᓱᐊᒧᑦ ᐅᕝᕙᓘᓐᓃᑦ ᐅᓇᒻᒥᒋᔭᐅᓗᑎᒃ ᐱᔭᐅᒐᓱᐊᑦᓴᓕᕐᓂᕈᑎᒃ ᐊᓐᓇᐅᒪᒐᓱᐊᒧᑦ. ᓇᑦᓰᑦ ᐃᒫᓂ ᐊᕐᖃᐅᒪᒍᓐᓇᑐᑦ 20 ᒥᓂᑦᓯᒥ, ᐊᕐᖃᐅᒪᕙᓪᓗᓲᒍᑦᓱᑎᒃ 4 ᒥᓂᑦᓯᒥᑦ 8 ᒥᓂᑦᓯᒧᑦ ᐊᑯᓂᐅᑎᒋᔪᖅ. 40m ᒦᑕᓄᑦ ᐃᑎᓂᓕᒻᒨᕈᓐᓇᓱᑎᒃ ᐊᒻᒪᓗ ᖃᐅᔨᒪᔭᐅᒻᒥᓱᑎᒃ 90m ᒦᑕᓄᐊᓪᓛᑦ ᐃᑎᓂᓕᒻᒨᕈᓐᓇᕆᐊᖏᑦ.

ᓇᑦᓰᑦ ᓄᓕᐅᓯᓲᑦ ᐊᕐᕌᒍᖃᓕᑐᐊᕋᒥᒃ ᓯᑕᒪᐅᔪᖏᒐᕐᑐᓂᒃ. ᓄᓕᐅᒋᕋᒥᒃ, ᐊᖑᑏᑦ ᐱᕈᕐᓭᖃᑕᐅᓲᒍᑦᔭᖏᑦᑐᑦ ᓇᑦᓯᐊᕋᕐᓂᒃ. ᐊᕐᓀᑦ ᓯᑯᒥ ᓴᒡᒐᓱᑎᒃ ᐃᓂᑦᓴᓕᐅᕐᓯᒪᓲᑦ ᐱᐊᕋᕐᑖᕕᒋᓚᖓᔭᒥᓂᒃ. ᖃᑯᕐᑕᐅᓱᑎᒃ ᐃᓅᓕᓲᑦ ᓇᑦᓯᐊᕌᐲᑦ ᐅᖁᒣᓐᓂᖃᕈᓐᓇᓱᑎᒃ 4.5 kg-ᓂᒃ ᐊᒻᒪᓗ ᑕᑭᓂᖃᕈᓐᓇᓱᑎᒃ 64 cm-ᓂᒃ ᐃᓅᓕᕐᓱᑎᒃ. ᐊᓈᓇᒥᓄᑦ ᓴᕐᓕᐊᖑᓲᑦ ᐱᓇᓱᐊᕈᓯᕐᓂ 5-ᓂᑦ 7-ᓄᑦ ᐊᑯᓂᐅᑎᒋᔪᖅ, ᐅᖁᓭᓐᓂᑖᓲᑦ 10 kg-ᓂᑦ 12 kg-ᓄᑦ ᓇᑦᓯᐊᕋᐅᓂᕐᒥᓂ, ᐊᕐᓀᑦ ᓴᒡᒐᓯᒪᒋᐊᓪᓚᓲᑦ ᑐᕐᓲᑯᑖᒋᐊᓪᓚᓂᒃ ᓯᑯᒥ ᓇᓄᕐᓄᑦ ᐱᔭᐅᑦᑌᓕᒐᓱᐊᒧᑦ, ᓀᒍᓐᓇᒪᑕ ᐊᐳᑎᐅᑉ ᐃᑭᐊᖓᓂᕐᑐᓂᒃ, ᓀᑐᐊᕋᒥᓗ ᖁᓛᓂᒃ ᓯᖁᒥᑦᓯᒐᓱᐊᓲᒍᑦᓱᑎᒃ ᐅᖁᒣᓐᓂᒥᓄᑦ ᓯᖁᑦᑎᕆᒐᓱᐊᕐᓱᑎᒃ.

Back to Top